“Se hai algo que é realmente universal é a igualdade, non hai outro valor máis fundamental”.
Con estas palabras, a presidenta da Deputación de Pontevedra, Carmela Silva, xunto ao reitor da Universidade de Vigo, Manuel Reigosa, presentou hoxe a nova web da Cátedra Feminismos 4.0, www.catedrafeminismos.gal “un espazo moi importante que permitirá vertebrar todos os proxectos desenvoltos ao redor desta iniciativa”.
«A igualdade é un compromiso»
Carmela Silva e o reitor Manuel Reigosa coincidiron en que “a igualdade é máis que unha bandeira, é unha obriga e un compromiso”. A presidenta provincial lembrou que a cátedra de feminismos, posta en marcha coa Uvigo fai un ano, “é unha iniciativa pioneira que nos sitúa aínda máis como referencia a nivel nacional no ámbito de investigación e innovación”.
En canto á web, destacou que “é unha carta de presentación pero ao mesmo tempo un lugar de onde atopar todo tipo de información tanto vinculada á Cátedra como ao coñecemento, á investigación e innovación e á análise feminista”. Amais, subliñou que “vai haber información moi relevante de estudos de xénero porque o feminismo é un proxecto de transformación
baseado en análises rigorosas”.
A UVigo, un referente
Na presentación, Silva tamén puxo en valor a “o traballo excepcional” da Universidade de Vigo e a súa capacidade para transformar, “é un referente en todos os seus posicionamentos en relación á presencia das mulleres e na loita porque ocupemos a metade dos espazos”.
Son necesarias máis mulleres nas carreiras STEM
A presidenta amosou a súa preocupación porque o número de matriculadas nas carreiras STEM (ciencia, tecnoloxía, inxenería e matemáticas) sexa cada vez menor, “a ciencia e a tecnoloxía son claves no mundo actual e van ser prioritarias no corto, medio e longo prazo”.
Espazo virtual de difusión e comunicación global
A web da Cátedra é un espazo virtual para comunicar toda a actividade do proxecto, difundir publicacións de interese, informar sobre convocatorias e enlazar a organizacións que traballen nesta área.
Máis polo miúdo, as usuarias e usuarios poderán encontrar nela toda a información e noticias sobre a Cátedra (seminarios, avisos sobre bolsas de investigación, axenda de actividades, etc) e tamén vídeos propios, como é o caso do Workshop 2019 da Cátedra.
Amais, tamén se enlaza con diferentes entidades investigadoras neste ámbito como é MediaLab en Vigo, Donestech en Barcelona, GenderlT.org (en Sudáfrica, América Latina e India), Fundación Activismo Feminista Digital (Argentina), distintas universidades norteamericanas, e outras institucións. As persoas interesadas tamén poderán subscribirse ao boletín de novidades, que se enviará cada quince días.
Comité de sabias
A presidenta provincial lembrou que no pasado mes de xullo a Deputación renovou o convenio coa Universidade de Vigo e xa están en marcha novas actividades coma os premios GirlGeekCovid e novas axudas á investigación con perspectiva de xénero. Amais, recordou que se creará un comité de sabias e se organizará un workshop virtual que dará continuidade ao que se celebrou o ano pasado “Sociedade dixital e xénero: hackeando o patriarcado”.
