O Concello ven de abrir o prazo para a preinscrición, presencial e por Internet, de alumnado de novo ingreso nas distintas especialidades que conforman a oferta educativa na Escola Municipal de Artes e Oficios de Vigo.
En total, convócanse 206 novas prazas para os cursos básicos en horario de tarde e 118 para os cursos de iniciación en horario de mañá.
As especialidades que se convocan, son, en Curso Básico de tardes: Pintura, Debuxo artístico, Talla e escultura en madeira, Ourivaría, Artesanía en coiro, Deseño e encaixe de palillos, Moda e confección, Construción artesanal de Zanfonas, Construción artesanal de gaitas, Cerámica artística e Encadernación
Curso de Iniciación, polas mañás : Pintura, Debuxo artístico, Talla e escultura en madeira, Ourivaría, Artesanía en coiro, Moda e confección, Construción artesanal de zanfonas e Encadernación.
Cursos extraordinarios –polas tardes-: Moda e confección «Drapeados e Lenzaría», Deseño e encaixe de palillos: «De Cluny a contemporáneo».
Os prazos de preinscrición son ata o 6 de setembro -só internet-; ata o 31 de xullo e de 2 a 6 de setembro -presencial e internet-. Para obter máis información pódese preguntar na propia escola de Artes de Oficios, en García Barbón, 5, en horario de 10 a 14 horas, laborables de luns a venres -agosto, pechado-, no enderezo electrónico [email protected] e no teléfono 986228088.
