O Parlamento de Galicia aprobou este xoves unha proposición non de lei, por iniciativa do Grupo Popular, a través da que se solicita ao Concello de Vigo unha “solución inmediata aos retrasos na tramitación dos recursos de servizos sociais municipais”. A deputada popular Marián García Míguez considerou “dramático” que 63.000 persoas de Vigo teñan un ingreso inferior ao limiar da pobreza e o Concello tarde 181 días en emitir o informe social para a percepción da Renda de Inserción Social de Galicia (Risga), cando o tempo que teñen os concellos galegos é de 30 días.
A deputada popular recoñeceu que Vigo “ten o peor dato de Galicia na taxa de desemprego e de risco de pobreza”. En concreto, indicou que “máis do 21% dos vigueses teñen un nivel de ingresos por debaixo do cal unha familia é incapaz de satisfacer as necesidades dos seus membros”.
Así mesmo, García lembrou que colectivos sociais como Os Ninguéns, a Plataforma antidesafiuzamentos, a Rede Solidaria Popular ou a Federación de Asociacións de Veciños Eduardo Chao “trasladan todas as semanas a situación que está a acontecer no Concello de Vigo coa tramitación das axudas sociais, chegando ao punto de que as propias traballadoras sociais do Concello denunciaron demoras de ata un ano para cobrar a Risga”.
