A Mesa pola Normalización Lingüística denuncia un novo caso de discriminación por parte da Axencia Tributaria a todos os usuarios galegofalantes, que se queren empregar a lingua galega nos formularios dispoñibles teñen que redirixilos de novo á marxe dos oficiais.
Nesta ocasión, a Mesa explica o caso dun usuario que se dirixiu en reiteradas ocasións a Facenda nun trámite de devolución para reclamar o seu dereito a que os procedementos dun expediente se realizasen en galego, como recolle o artigo 36.1 da Lei 30/1992.
Ante a «actitude de desprezo e atención discriminatoria» recibida por parte da Axencia Tributaria, o cidadán devolveu o ingreso realizado pola administración tributaria como protesta «pola maneira en que a AEAT trata aos usuarios da lingua galega». Finalmente, Facenda empregou o galego nun escrito oficial no que asegura que «nas aplicacións corporativas de Recadación non hai posibilidade de que as comunicacións se realicen en galego».
A Mesa denuncia que a institución «non ten ningún interese nin en cumprir a legalidade nin en dar a mínima opción a usar a lingua propia en trámites que ademais son absolutamente obrigatorios» e califica de «incrible» que alegue falta de medios para non usar o galego.
Dende a Mesa destacan a «actitude galegófoba de Facenda», que provoca molestias, cargas e trámites innecesarios «só a quen utiliza o galego».
