O Diario Oficial de Galicia recollerá na súa publicación deste 28 de marzo a orde pola que se regularán as bases das subvencións para entidades de acción voluntaria e entidades locais do programa Servizo de Voluntariado Xuvenil e procederase á súa convocatoria para o ano 2016.
Este programa incorpora ás entidades de acción voluntaria e ás entidades locais inscritas no Rexistro de Acción Voluntaria de Galicia a mozos e mozas galegos de entre 16 e 30 anos para a súa colaboración como voluntarios na realización de proxectos relacionados prioritariamente co Camiño de Santiago; coa recuperación da cultura, arte e tradicións populares galegas; con colectivos en situación de risco; con actividades xuvenís, ambientais ou relacionadas coa igualdade de xénero; e coa posta en marcha de programas de voluntariado no ámbito familiar por parte das entidades.
A principal novidade da convocatoria deste ano é que as persoas voluntarias que xa colaboraran en anteriores anos poderán repetir a súa participación nos proxectos de acción voluntaria que se leven a cabo neste ano e que se desenvolverán entre o 1 de xaneiro e o 15 de outubro de 2016.
1,5 millóns para o Servizo de Voluntariado Xuvenil
Desde o ano 2011 preto de 2.500 mozos voluntarios desenvolveran 422 proxectos de acción voluntaria de entidades e concellos. En 2016 prevense como beneficiarias das axudas 100 entidades de acción voluntaria e 60 entidades locais, que suporían un total de 160 proxectos de voluntariado executados por aproximadamente 800 persoas voluntarias.
