Marea de Vigo ven de denunciar que nos últimos días esboroáronse boa parte dos perpiaños de granito que conformaban os números 10, 11, 12, e 13 do Barrio do Cura. Segundo lembra, “este singular conxunto de vivendas populares do século XIX, que contaban con solainas, pórticos e lavadoiro comunal, foi declarado Ben de Interese Cultural no ano 2006, e leva, igual có resto do barrio, 15 anos en situación de abandono por parte dos seus propietarios, Valery Karpin Asociados Inmobiliarios, e máis polo Concello de Vigo, que é o responsable legal da súa conservación”
Este colectivo salienta que “para máis escarnio, precisamente este conxunto de arquitectura popular é dos poucos elementos de patrimonio histórico que o Plan Especial de Reforma Interior do Barrio do Cura esixe conservar” e que, á vista do seu estado, haberá que reconstruir.
Marea de Vigo denuncia “esta lamentable situación”, e esixe que dende a administración se rehabilite e consolide o conxunto de elementos de patrimonio, bens e espazos públicos do Barrio do Cura, “actualmente abandonados por lo Concello mesmo e os seus propietarios”.
