A conselleira de Traballo declarou este xoves que o seu compromiso cos dependentes galegos se basea, «sobre todo, en garantir atención de calidade» e en prestar servizos con «distinción profesional», tendo en conta que o obxectivo da lei é «precisamente a protección das persoas afectadas, e non das familias».
Preguntada en rolda de prensa sobre os recortes en dependencia, Betariz Mato salientou o incremento anual do número de dependentes atendidos en Galicia e abundou en que a atención que reciben é «sempre» de calidade, é dicir, con servizos que supoñen un esforzo económico por parte da Xunta «superior ao que sería facer chegar paguiñas».
«A paga é diñeiro que entra nunha familia, e para min, o mais importante é que sexa para o dependente e non para a familia», defendeu, para explicar que «moitas veces un familiar non pode tratar o dependente da forma en que o necesita» e por iso o Goberno aposta «polas prazas e non polas pagas».
En relación co recorte dos fondos para dependencia por parte do Estado, Beatriz Mato subliñou que a Xunta achega «preto do 80 % de recursos propios» para compensar a caída. «Creo que esta porcentaxe é o suficientemente significativa para mostrar o grao de compromiso que ten esta comunidade autónoma e o grao de esforzo para o desenvolvemento da lei», reivindicou, e engadiu que o 60 % dos fondos da área social da Consellería de Traballo están destinados á dependencia.
A preguntas dos xornalistas sobre que haxa dependentes que deban abandonar as súas residencias ao non poder facer fronte ao seu custo, a conselleira asegurou que «a día de hoxe non ten constancia de que ninguén queira saír do sistema nin rexeite a achega económica que se pode dar».
