O Goberno recoñeceu que “non haberá solución a curto prazo» para os mariños españois que, nas décadas dos 60 e 70 do pasado século, traballaron en buques de bandeira norueguesa e cotizaron naquel país, pero aos que non se lles recoñece dereito a pensión por eses anos. Así o admite nunha resposta parlamentaria á voceiro do BNG no Congreso, Olaia Fernández Davila.
No texto, explícase que o pasado mes de outubro as autoridades norueguesas informaron a Embaixada española en Oslo de que o seu Ministerio de Exteriores empezou a negociar co de Facenda sobre este tema.
“Os primeiros contactos establecidos non fan pensar que fose posible unha solución a curto prazo» xa que aínda que o Goberno de Noruega recoñece «razóns éticas e de xustiza» a favor da causa dos mariñeiros, o seu departamento de Facenda «non atopa ningún apoio xurídico» para ofrecerlles unha solución.
No mesmo sentido, o xefe de División da Oficina do Valedor do Pobo noruegués – «a única institución interesada seriamente neste tema» segundo o Executivo español- informou a Embaixada de que non se atopa ningunha base legal para atender as reclamacións e de que, posto que non se atopou ningunha ilegalidade nas actuacións da Administración norueguesa, non pode continuar intervindo neste asunto».
