O grupo municipal do BNG calificou este mércores de «indecente» que o Concello non executara a totalidade das partidas destinadas a bolsas de comedor e libros, e ao plan social de axuda para familias con necesidades.
Iolanda Veloso, criticou que o goberno local dispoña desas partidas dende hai meses e «non dá ningunha explicación» de por que non se executan. «Para outras apresúranse máis. En menos dun mes fixeron unha amortización de crédito para dar axudas a unha aerolínea», denunciou a voceira do BNG.
A concelleira lembrou que hai familias que aínda non teñen resposta sobre se obterán bolsas para libros ou para o comedor escolar, e que o plan social de axudas a familias se atrasa por dificultades na tramitación, cando «non hai complexidade que xustifique esa demora».
Veloso denunciou que ”o goberno non é capaz de xestionar os seus propios recursos, sobre todo cando hai familias viguesas que non poden afrontar as súas «necesidades máis básicas».
En resposta ás críticas do BNG, o alcalde salientou que son «acusacións infundadas», e apuntou que as axudas para escolares «están concedidas».
Falando do plan de axudas a familias, Caballero lembrou que a súa tramitación foi moi complexa, polas dificultades para localizar algúns dos cidadáns que optaban ás axudas e emendar deficiencias nas solicitudes.
O alcalde adiantou que «de forma inmediata«, pagaranse esas axudas, de máis de 1.000 € por familia, e reprochou aos nacionalistas que critiquen a iniciativa, en lugar de propoñer ao seu partido que «copie» ese plan alí onde goberna, por exemplo, no Concello de Pontevedra.
