O secretario de Estado de Infraestruturas afirmou este xoves que a liña de AVE entre Ourense e Vigo é un proxecto «bloqueado dende o punto de vista ambiental». Esta foi a resposta de Rafael Catalá á pregunta do senador Fidalgo, do Partido Socialista, sobre as actuacións para os anos 2012 e 2013 na liña ferroviaria de alta velocidade entre Ourense e Vigo, “con indicación das previsións e importes e do momento de tramitación en que se atopa”.
«Atopamos un proxecto bloqueado dende o punto de vista ambiental. Hai que desbloquealo», afirmou o secretario de Estado, quen engadiu que «hai que facer novo proxecto, sometelo a Declaración de Impacto Ambiental (DIA) e negociar co Ministerio de Medio Ambiente para resolver os problemas».
Catalá afirmou que «un dos eixes da política ferroviaria» do Ministerio e de Adif ten que ver coa «cohesión e a vertebración territorial» e, polo tanto, tamén facer chegar a alta velocidade a aqueles territorios que aínda non dispoñen dela.
Nesta liña, detallou que no ano 2012, dos 1.455 millóns de euros que o Ministerio de Fomento asignou a Galicia «case 1.000 millóns eran para ferrocarrís» e que dos 2.215 millóns de 2013, 786 millóns foron destinados ao mesmo fin.
