Adif limitou a 30 quilómetros por hora a velocidade no tramo de vía ferroviaria próxima a Santiago no que o pasado 24 de xullo descarrilou o Alvia Madrid-Ferrol, segundo informou o Ministerio de Fomento.
Esta limitación, de carácter temporal, instaurouse coa colocación por parte de Adif o pasado luns dunha baliza e un cartelón no punto quilométrico 81 da vía, tres quilómetros antes do 84, o punto exacto no que se produciu o sinistro. A baliza estará protexida por unha anterior que limita a velocidade a un máximo de 60 quilómetros por hora.
Ademais, un pouco antes, no punto quilómetro 79, cinco antes do accidente, Adif colocou onte xoves unha baliza ASFA e un cartelón que limita a velocidade a 160 quilómetros por hora.
Trátase das primeiras medidas tomadas polo ente público que preside Gonzalo Ferre tras o accidente, que ademais está previsto estendelas a todos os tramos de vía con características similares.
Esta medidas son á súa vez froito da revisión de todos os protocolos de seguridade que Adif puxo en marcha tras o accidente de Santiago, pola que deu instrucións aos seus técnicos para revisar todos aqueles tramos de rede que presenten condicións parecidas á do sinistro, en especial as zonas que supoñen unha integración en núcleos urbanos.
Fomento indicou que o presidente de Adif informará sobre o avance destas medidas na súa comparecencia no Congreso dos Deputados programada para o xoves 8 de agosto.
