Carlos Díaz | vigoalminuto
Vigo acolle toda esta semana a terceira edición da Semana Internacional das Linguas, as Literaturas e a Tradución e do Festival das Linguas e as Culturas, unha iniciativa da Facultade de Filoloxía e Tradución da Universidade de Vigo que busca sacar á rúa o traballo desenvolvido arredor das linguas, as literaturas e a tradución e achegalo tanto ao alumnado como á cidadanía.
O programa, que se desenvolve entre o luns 21 e o sábado 26 de setembro, está vinculado a tres datas internacionais: o Día Internacional das Linguas de Sinais, que se celebra este mércores, día 23; o Día Europeo das Linguas, o 26; e o Día Internacional da Tradución, o 30 de setembro.
O gran punto de encontro será o Festival das Linguas e as Culturas, que se celebrará o sábado 26 de setembro entre as 11.00 e as 20.00 horas na Praza do Berbés e no Edificio Redeiras. A programación distribuirase en diferentes espazos e contará tamén cunha zona de xogos para crianzas durante toda a xornada.
Cursos de idiomas
A programación comeza cos cursos de euskera e lituano, que se desenvolverán de luns a xoves, entre as 18.30 e as 20.00 horas, na sede viguesa da Deputación de Pontevedra. O curso de euskera terá lugar na sala de prensa, mentres que o de lituano se impartirá na aula multiúsos. As dúas actividades son gratuítas, aínda que requiren inscrición previa.
Letras en Feminino
O mércores 23 será a quenda da xornada Letras en Feminino, ás 17.00 horas na Sala Rosalía de Castro da sede viguesa da Deputación. Ao día seguinte, o xoves 24, a actividade trasladarase á rúa do Príncipe e ao Museo MARCO coa Xornada Investiga, prevista para as 10.00 horas.
Xa pola tarde, a Casa Galega da Cultura acollerá, entre as 18.30 e as 20.30 horas, a mesa redonda “Da idea ao libro: as mans invisibles”, centrada no traballo que hai detrás da creación e publicación dun libro.
Formación do profesorado
O venres 25 estará dedicado á formación do profesorado de idiomas, cunha xornada na Escola Oficial de Idiomas de Vigo entre as 15.15 e as 20.00 horas. Segundo a organización, xa hai máis de 100 persoas inscritas.
A iniciativa está organizada pola Facultade de Filoloxía e Tradución da Universidade de Vigo e conta co patrocinio do Concello de Vigo e da Deputación de Pontevedra, ademais da colaboración de numerosas entidades culturais, asociacións, empresas e colectivos vinculados ás diferentes comunidades lingüísticas e culturais.
A programación completa, os formularios de inscrición e toda a información sobre as actividades están dispoñibles na web da iniciativa.
OuTraS NoVaS
- Vigo fala ao mundo: unha semana para descubrir linguas e culturas sen saír da cidade
- La Diputación incluirá 400.000 euros en su presupuesto de 2027 para captar vuelos en Peinador
- Povisa estrena su nuevo robot quirúrgico con una operación urológica
- Una médica del Álvaro Cunqueiro acepta más de un año de cárcel por falsificar recetas de una compañera
- Baiona afronta tres días de posibles cortes de luz por trabajos en la red eléctrica
