O Concello do Porriño deu un novo paso na modernización das súas infraestruturas culturais coa licitación das obras do «Proxecto de ampliación do auditorio para unha nova sala de exposicións e anfiteatro», unha actuación que suporá a segunda fase do futuro gran complexo sociocultural do municipio.
A intervención, que se executará na rúa Xosé Fernández López, permitirá ampliar as prestacións do edificio actualmente en construción e crear novos espazos destinados á actividade cultural, social e de lecer.
Un auditorio con capacidade para 350 persoas
O principal obxectivo do proxecto é dotar ao Porriño de instalacións máis versátiles, modernas e accesibles. O novo volume arquitectónico conectarase directamente co auditorio en execución e incorporará un anfiteatro con capacidade para 25 novas butacas orientadas ao escenario principal, o que permitirá incrementar o aforo total do complexo ata as 350 prazas.
Segundo explicou o alcalde do Porriño, Alejandro Lorenzo, o deseño deste anfiteatro contou co asesoramento da artista porriñesa Janeth Novás.
Ademais, a ampliación incluirá unha sala de usos múltiples e exposicións situada na planta superior, á que se accederá mediante unha rampla accesible. O edificio contará tamén con aseos adaptados, un almacén e unha pequena zona de cociña para dar servizo ás diferentes actividades que se desenvolvan no recinto.
Unha cafetería ao aire libre na cuberta
Un dos elementos máis singulares do proxecto será o aproveitamento da cuberta plana do edificio, deseñada pola arquitecta Estefanía Grandal Leirós, onde se habilitará unha terraza destinada a unha cafetería ao aire libre.
Este novo espazo ofrecerá vistas privilexiadas sobre o centro urbano do Porriño e está concibido tanto para acoller grandes eventos como para converterse nun novo punto de encontro e lecer para a veciñanza.
«Coa licitación desta segunda fase, O Porriño dá un salto cualitativo na súa oferta cultural. Non só ampliamos o espazo físico do Auditorio ata as 350 prazas, senón que creamos un punto de encontro vivo, moderno e accesible para todos os veciños e veciñas», asegurou o alcalde.
Integración coa contorna e eficiencia enerxética
O proxecto aposta por unha integración arquitectónica co Centro Cultural e coa Biblioteca Municipal, edificios construídos en pedra Rosa Porriño. Para iso, o novo volume contará cunha fachada ventilada revestida con chapa de zinc de cor marrón, procurando unha imaxe contemporánea e en harmonía coa contorna.
As obras incluirán tamén a urbanización integral dos aproximadamente 500 metros cadrados da parcela exterior para crear un espazo peonil accesible, mellorar a circulación de vehículos destinados á carga e descarga de material escénico e habilitar unha nova rúa perpendicular que facilitará o acceso ao montacargas municipal.
En materia de sostibilidade, a nova infraestrutura incorporará un sistema de climatización mediante bomba de calor aerotérmica, co obxectivo de cumprir os máximos criterios de eficiencia enerxética.
Máis de 737.000 euros de investimento
As obras saen a licitación por un importe de 737.291,87 euros, mediante procedemento aberto, e contarán cun prazo máximo de execución de sete meses desde a súa adxudicación.
Esta actuación enmárcase nos programas cofinanciados pola Unión Europea e permitirá completar unha nova fase do futuro complexo sociocultural do Porriño, chamado a reforzar a oferta cultural e de lecer do municipio.
OUTRAS NOVAS
- O Porriño terá un auditorio con cafetería na cuberta, máis capacidade e novos espazos culturais
- Marisquiño 2026 amplía su programación familiar con más de 40 actividades gratuitas para niños en Samil y Navia
- El Concello propone a Deep Purple retrasar su concierto de Castrelos para emitir el partido de España
- Seis ‘banderas negras’ para As Catedrais, Illa Pancha, Baiona, Monte Neme, Ferrol e Vigo
- ¿Dónde están las viviendas municipales que el alcalde dice que están en marcha en Vigo?
