A Audiencia Provincial de Ourense decretou o sobresemento da causa na que se investigaba ao alcalde da cidade, Gonzalo Pérez Jácome, por un presunto delito continuado de prevaricación relacionado coa falta de solicitude de compatibilidade entre o seu cargo público e as súas actividades privadas. Esta decisión deixa sen efecto a imputación do rexedor, para quen a Fiscalía reclamaba unha pena de nove anos de inhabilitación.
A Sala estimou o recurso de apelación presentado pola representación procesual de Pérez Jácome contra o auto da Sección de Instrución do Tribunal de Instancia de Ourense que acordara continuar o procedemento por un suposto delito continuado de prevaricación.
Na resolución, a Audiencia subliña que «non toda omisión ou incumprimento dun deber por parte dun funcionario pode catalogarse de prevaricación» e lembra que «non basta que unha resolución administrativa sexa contraria a Dereito para que constitúa o delito de prevaricación».
A Fiscalía sostivera no seu escrito de acusación que o alcalde percibía unha retribución en réxime de dedicación exclusiva mentres desenvolvía actividades privadas que consideraba «absolutamente incompatibles» co cargo e que lle reportaban uns ingresos anuais superiores ao salario como rexedor.
De existir algunha irregularidade, debería resolverse na xurisdición contencioso-administrativa
Con todo, a Audiencia considera «cuestionable» esixir unha declaración de compatibilidade cando un membro dunha corporación local con dedicación exclusiva realiza actividades remuneradas de carácter marxinal. Ademais, entende que, de existir algunha irregularidade, esta debería resolverse na xurisdición contencioso-administrativa, unha vía á que, segundo sinala, non se recorreu.
O tribunal tamén subliña que a actuación de Pérez Jácome puido estar amparada por informes xurídicos e lembra que a propia Fiscalía xa investigara anteriormente os mesmos feitos, arquivando aquelas dilixencias ao concluír que non existía infracción penal, senón unha posible irregularidade administrativa.
Outro dos argumentos recollidos na resolución é que, durante todo o tempo no que o alcalde desempeñou o cargo mantendo a actividade privada agora cuestionada, «en ningún momento consta efectuado reparo algún de legalidade por parte dos técnicos do Concello».
Por todo iso, a Audiencia conclúe que, «de existir unha irregularidade de carácter administrativo», será esa a vía na que deban depurarse as posibles responsabilidades, descartando que os feitos poidan ser constitutivos dun delito de prevaricación.
A resolución non é firme e contra ela cabe presentar recurso de casación.
OUTRAS NOVAS
- A Audiencia de Ourense arquiva a causa contra Jácome por prevaricación e descarta delito: “é unha cuestión administrativa”
- 7,6 millones de euros para las nuevas obras de humanización en Coia, que arrancarán en julio
- Caballero arremete contra Louzán por el Mundial 2030… aunque el presidente de la RFEF declaró que Vigo tiene que ser sede
- La Diputación ofrece pagar la reforma integral de Clara Campoamor y acusa a Caballero de no pedir los fondos
- Detenido en Vigo por apuñalar a un hombre cerca del corazón tras una pelea por un partido de fútbol
