O Concello de Redondela informa de que o inicio do servizo de socorrismo nas praias da Punta e Arealonga sufrirá un atraso temporal debido á suspensión do proceso de licitación do contrato tras a presentación dun recurso administrativo.
Segundo explica o Goberno local, a interposición deste recurso obriga a paralizar o procedemento ata que o Tribunal Administrativo de Contratación Pública de Galicia (TACGal) dite unha resolución firme sobre o expediente.
A alcaldesa, Digna Rivas, sinala que o Concello está supeditado aos prazos legais que marque este órgano independente, aínda que subliñou que o Executivo municipal mantén como prioridade garantir a seguridade nos areais do municipio durante a tempada estival.
«En canto chegue a resolución do tribunal, o Concello axilizará ao máximo todo o proceso administrativo para que o servizo de socorrismo poida comezar o máis rápido posible», afirmou a rexedora.
A limpeza de praias sí que funciona
Mentres tanto, o servizo municipal de limpeza de praias xa iniciou a súa actividade con total normalidade e permanecerá operativo de forma ininterrompida ata o vindeiro 15 de setembro.
O operativo, subliñan dende o Concello, desenvólvese seguindo criterios de protección ambiental e mantemento sostible do litoral. As praias da Punta, Arealonga e Os Penedos contarán con limpeza diaria, mentres que os traballos tamén abranguerán os paseos marítimos de Cesantes, Arealonga e Cardona, así como os accesos, zonas verdes, aparcadoiros e áreas de xogos infantís.
Ademais, o Concello reforzará as tarefas de mantemento noutros areais do municipio. As praias de Soutoxuste e Rande disporán de limpeza tres días á semana, mentres que a praia de Cabanas, en Trasmañó, contará con dúas xornadas semanais de limpeza.
O Concello destaca que estes traballos se realizan respectando o equilibrio biolóxico do entorno litoral. A retirada de algas, argazos e restos vexetais efectúase exclusivamente de xeito manual e conforme á normativa vixente, xa que forman parte natural do ecosistema mariño e contribúen á protección das praias fronte á erosión.
O servizo préstase en colaboración cun centro especial de emprego de iniciativa social, un modelo que o Goberno local mantén pola súa eficacia na xestión e polo seu valor integrador.
OUTRAS NOVAS
- Redondela atrasa o socorrismo en A Punta e Arealonga, por un recurso contra a licitación
- La música tradicional gallega conquista este martes el centro de Vigo
- Sanidade activa su plan sanitario de verano, pero Vigo perderá hasta 180 camas y afronta más presión asistencial
- Activo el mayor operativo de playas del verano: más de 130 profesionales velan por tu seguridad en los arenales de la ciudad
- Condenan a Rafa Mir a 8 años y medio de prisión por agresión sexual: la Audiencia da plena credibilidad a las víctimas
