O Porriño volverá converterse esta fin de semana no epicentro da moda e do comercio local coa celebración da cuarta edición da Fashion Weekend, unha cita xa consolidada no calendario da vila e que reunirá compras, música en directo, descontos e un gran desfile ao aire libre.
Durante dúas xornadas, o municipio porriñés encherase de ambiente coa participación de 27 tendas e 10 perruquerías e salóns de peiteado, nun evento pensado para dinamizar o comercio local e atraer visitantes.
A presentación oficial tivo lugar este martes no Concello do Porriño, onde o alcalde, Alejandro Lorenzo, destacou a forza do tecido comercial da localidade e asegurou que esta fin de semana a vila “non ten nada que envexar a Milán nin a París”.
O rexedor subliñou ademais que “un municipio con comercio forte é un municipio vivo”, poñendo en valor a importancia de mercar no pequeno comercio tanto para fortalecer a economía local como para manter a cohesión social.
Pola súa banda, a concelleira de Comercio, Rosa Isabel Alonso, incidiu na relevancia deste tipo de iniciativas para atraer xente ao centro urbano e impulsar a actividade económica.
Shopping Night ata as 00:00 e gran desfile o sábado
A programación arrancará o venres 24 de abril coa xa popular Shopping Night, unha noite especial na que os establecementos abrirán en horario ampliado ata as 00:00 horas.
Ademais das compras, os asistentes poderán atopar descontos, sorteos, agasallos e diversas sorpresas preparadas polos negocios participantes.
O ambiente festivo completarase coa actuación de seis DJ’s, que animarán as principais rúas do municipio durante toda a noite.
O prato forte chegará o sábado 25 de abril coa celebración da Fashion Night, un gran desfile de moda na Praza Antonio Palacios, que volverá transformarse nunha gran pasarela ao aire libre.
Esta edición estará presentada pola comunicadora galega Lucía Rodríguez, mentres que a escola Small Big Models será a encargada de lucir as propostas dos comercios participantes.
A xornada incluirá tamén un espectáculo de performance con Pablo Méndez, música da man de Maison e varias sorpresas que a organización manterá en segredo ata o último momento.
O comercio local, protagonista
A Fashion Weekend consolidouse como unha das grandes citas promocionais do comercio no Porriño, convertendo a vila nun escaparate da moda, da creatividade e do potencial económico local.
Veciñanza e visitantes teñen así unha nova oportunidade para gozar dunha fin de semana diferente, con compras, ocio e moda no corazón do municipio.
Outras novas
- Detenido tras matar a su pareja en plena calle, en Figueres
- Vigo tendrá una nueva área de cirugía maxilofacial, en el Meixoeiro
- El BNG acusa al alcalde de “simular” políticas de vivienda en la ciudad
- Caballero acusa a la Diputación de deber 6 millones en obras en Vigo
- Colapso do mexillón en Galicia: pechan todas as bateas pola marea vermella
