A xornada de folga no gran comercio deixou este venres tendas pechadas en Vigo e noutras cidades galegas, con especial impacto en cadeas como Inditex. O paro convocado pola CIG rexistrou un seguimento masivo, especialmente nas provincias da Coruña e Pontevedra, deixando numerosas tendas pechadas e outros establecementos funcionando con servizos mínimos.
As protestas celebráronse en Vigo, A Coruña, Pontevedra, Lugo, Ferrol, Santiago de Compostela e Vilagarcía. O sindicato rexeita o preacordo asinado por ARTE, CCOO e FETICO e reclama un acordo interprofesional galego do comercio que protexa os convenios provinciais e garanta a súa prioridade fronte ao estatal.
Segundo a CIG, o novo convenio estatal afectaría ás condicións laborais do persoal de empresas como Inditex, H&M, Mango, Primark ou Tendam. A central sindical denuncia perdas salariais de entre 2.000 e 3.000 euros anuais nas provincias da Coruña e Pontevedra, ademais da eliminación de complementos de antigüidade e permanencia noutros territorios galegos.
Entre os puntos máis criticados tamén figura a obrigatoriedade de traballar domingos e festivos de apertura, menor previsión nos horarios laborais e a posibilidade de contratación fixa-descontinua a tempo parcial.
Na provincia da Coruña, a folga continua este sábado 18 de abril con novas concentracións na Praza de Lugo da Coruña, no centro comercial As Cancelas de Santiago e no centro comercial Odeón de Ferrol.
A mobilización supón unha nova mostra do conflito laboral aberto no sector do comercio en Galicia, onde sindicatos e persoal denuncian unha perda progresiva de dereitos laborais fronte ás grandes multinacionais da distribución téxtil.
Outras novas
- O mercado de arte máis orixinal de Vigo regresa ao Calvario con máis de 80 artistas e entrada de balde
- ‘Scenic Eclipse’, el crucero de ultra lujo con submarino y helicópteros en el que un viaje cuesta casi 14.000 euros
- Galicia buscará más de 50.000 trabajadores este verano: camareros, dependientes y repartidores, los más demandados
- Así será Son e Mar, el nuevo festival que llenará Vigo de conciertos y música gratis
- La huelga del metal paraliza Vigo: miles de trabajadores colapsan la ciudad en plena «guerra» con la patronal
