O ex presidente de Cantabria, Miguel Ángel Revilla, será o encargado de ler o pregón da XXXIX edición da Festa do Choco de Redondela, que se celebrará do 8 ao 10 de maio. Así o anunciou o Concello, que aposta por unha figura mediática de primeiro nivel para reforzar a proxección desta cita gastronómica.
A alcaldesa, Digna Rivas, salientou que a presenza de Revilla supón “un impulso excepcional para a proxección exterior da nosa festa e do noso produto”, subliñando tanto o seu carisma como a súa capacidade comunicativa.
A lectura do pregón terá lugar o domingo 10 de maio, coincidindo coa xornada central do evento. Ademais, o sábado día 9, o político cántabro protagonizará un coloquio no Auditorio da Xunqueira, nun formato aberto ao público no que compartirá reflexións e experiencias.
Achegarse á figura de Revilla
Desde o goberno local subliñan que esta dobre participación permitirá á veciñanza e ás persoas visitantes achegarse á figura de Revilla dun xeito máis próximo antes do momento máis multitudinario da festa. “É unha oportunidade única para escoitalo de preto, nun ambiente máis persoal e participativo”, sinalou Rivas.
O Concello puxo en valor tamén o perfil de Revilla como defensor das políticas sociais e dos servizos públicos, así como o seu papel como divulgador da gastronomía e dos produtos do mar.
A rexedora concluíu facendo un chamamento á participación: “Estamos a traballar para que esta sexa unha edición histórica, combinando a calidade do noso choco coa hospitalidade que nos caracteriza e cun pregoeiro de excepción”.
A Festa do Choco está considerada unha das citas gastronómicas máis importantes de Galicia, reunindo cada ano a milleiros de persoas arredor dun dos produtos máis representativos da enseada de San Simón.
Outras novas
- Denuncian que el Sergas incorpora médicos sin la especialidad de Familia, en los PAC del área de Vigo
- Vigo e Nigrán quedarán unidos por unha senda de 14 quilómetros para camiñar e pedalear
- Nuevo pulso por la pantalla gigante: la Diputación lo intentará otra vez para el España-Francia tras el precinto
- Cangas convértese na capital galega do cómic
- Continúa la búsqueda de María Pereira en Redondela, con drones y nuevas batidas tras su desaparición en Vigo
