A Asociación Veciñal de Lavadores acolleu este sábado 28 de febreiro a asemblea constituínte de Artefacto, unha nova rede cultural galega que aspira a reunir creadoras e creadores de distintas disciplinas artísticas, culturais e científicas co obxectivo de construír un espazo creativo popular alleo ás lóxicas de mercado.
A xornada desenvolveuse en horario de mañá cun debate aberto no que participaron varias decenas de persoas, centrado na definición do proxecto e nas liñas de intervención no panorama cultural galego. No encontro foi elixido Antón Dobao como Voceiro Nacional e Alba Mourillós como Responsable de Intervención Cultural, ademais dunha Coordinadora Nacional integrada por outros once membros.
O acto completouse cun xantar popular e cun evento artístico multidisciplinar no que se combinaron distintas manifestacións creativas, en coherencia co carácter transversal da iniciativa.
Artefacto
Artefacto xurdiu o pasado verán coa publicación dun manifesto fundacional que acadou arredor de cen sinaturas, entre elas as de figuras da cultura galega como Xosé Luís Méndez Ferrín, Anxo Angueira, Inés Mosquera, Alexandra Cabana Outeiro, Antón Blanco e Inma Alonso.
No seu manifesto, a rede sitúase fronte ao que cualifica como “circuíto pechado” derivado do utilitarismo mercantil e aposta por un espazo de colaboración colectiva, antifascista, feminista e republicano. A súa finalidade é concibir as artes e a cultura como ferramentas de liberación e acción subversiva, promovendo —segundo recolle o texto— unha creación “en igualdade e sen dominación”.
Tras a súa constitución formal en Vigo, as persoas integrantes da rede comezan xa a traballar nun primeiro acto público de presentación e nunha intervención cultural coa que materializar as liñas programáticas expostas no manifesto.
Outras novas
- Renfe permitirá viajar sin asiento reservado en los trenes de Media Distancia entre A Coruña y Vigo
- La Diputación también busca en Frankfurt nuevas rutas para Peinador
- Caballero asegura en Zaragoza que Vigo tiene la mejor Navidad y el mejor alcalde del mundo
- 60 tiendas, comidas calientes y apoyo vecinal: así resiste la acampada por la vivienda en Vigo
- Muere un motorista en la N-120, en Ourense, tras salir de la vía y chocar contra el guardarraíl
