Cando a música se debuxa: Vigo acolle un concerto para escoitar e pintar

Vigo suma esta fin de semana unha proposta cultural orixinal e participativa que conecta son, imaxe e creación contemporánea. O sábado 31 de xaneiro ás 19:00 horas, o Auditorio da Fundación Mayeusis (Areal, 138) será escenario de ‘Música e pinceis’, un concerto debuxado en directo no que a música de cámara e o debuxo urbano dialogan ante o público.

A iniciativa, con entrada libre ata completar aforo, reafirma a aposta de Mayeusis por novos formatos culturais en Vigo, abrindo o auditorio fóra do seu horario habitual para acoller unha experiencia que vai máis alá do concerto tradicional.

Trío Cámara d’Ría

A actuación correrá a cargo do trío Cámara d’Ría, integrado por Fani F. Agulla (frauta travesa), Magui M. Muñiz (clarinete) e Ernesto Campos (guitarra). O grupo interpretará unha selección de música tradicional galega adaptada ao formato de cámara, achegando novas lecturas sonoras ao patrimonio musical do país.

Podes debuxar mentres soa a música

O elemento diferencial de ‘Música e pinceis’ é a súa dimensión participativa: as persoas asistentes poderán debuxar en directo aos músicos mentres interpretan o repertorio, transformando o auditorio nun espazo compartido de creación visual e musical. A participación gráfica é opcional, polo que o concerto está aberto tanto a debuxantes como a quen prefira simplemente gozar da música.

A proposta nace da implicación de Magui M. Muñiz e Ernesto Campos no movemento internacional Urban Sketchers (USK) —do que Vigo é cidade oficial desde o pasado ano— e da súa labor como docentes no Conservatorio Mayeusis. O evento conta coa colaboración de USK Vigo, que permitirá que un número reducido de debuxantes se sitúe no propio escenario xunto aos intérpretes.

Con esta iniciativa, Vigo continúa a consolidarse como cidade creativa, abrindo espazos para o encontro entre disciplinas artísticas e para novas formas de participación cultural que conectan coa cidadanía.