ADEGA apoia o mantemento da suspensión cautelar da caza do lobo ditada o pasado ano polo Tribunal Superior de Xustiza de Galiza (TSXG) e oponse frontalmente á solicitude que a Consellaría de Medio Ambiente vén de presentar no día de onte, 26 de xaneiro, para levantala.
A organización lembra que esta medida cautelar se ditou para protexer unha poboación nun estado de conservación desfavorábel mentres se resolve no Tribunal Constitucional (TC) o recurso de interposto polo «Defensor del Pueblo» contra a desprotección do lobo no LESPRE. Foi o PP no Congreso o que, mediante un artificio legal (emendas á Lei de Prevención das Perdas e o Desperdicio Alimentario) e co apoio da dereita extrema, Junts e PNV, provocou que o lexislativo estatal retirara o lobo da Listaxe de Especies Silvestres en Réxime de Protección Especial (LESRPE), ignorando o procedemento que habilita a Lei de Conservación da Natureza e os criterios científicos que manterían a súa protección.
Esta espúrea retirada do lobo do LESPRE vulnerou principios constitucionais de seguridade xurídica e non regresión ambiental, polo que ADEGA agarda que o TC anule esta manobra regresiva. Mentres isto non suceda, consideramos que a suspensión cautelar do TSXG segue sendo totalmente acaída e imprescindíbel.
Danos sen contrastar
O suposto incremento dos danos –sen contrastar, asegura a organización ecoloxista- «referidos pola conselleira como excusa para pedir ao TSXG o levantamento das cautelares, só agocha a inacción e o desleixo da Xunta na aplicación de medidas preventivas reais. Na súa valoración sobre incremento de avisos e danos, a Xunta limítase a usar datos en bruto e sen depurar, e non se coñecen informes técnicos que acrediten a que se deben estas variacións«. Entre as cuestións que deberían avaliarse está o efecto da mellora no coñecemento das axudas, da optimización do rexistro de avisos, da maior publicidade, do progresivo incremento de contías, ou mesmo das «campañas contra o lobo que a Xunta e o PP usan como ferramenta de confrontación política co Goberno central dende que este decidira incluír en 2021 o lobo no LESPRE».
Tampouco se coñecen datos recentes por medio de informes técnicos sobre a eficacia das medidas preventivas aplicadas nas comarcas cunha maior incidencia de denuncias. «Non hai seguimento, avaliación nin propostas de actuación nos lugares con recorrencia, nos que a Xunta se limita a reclamar controis letais en lugar de favorecer medidas compensatorias e para o bo manexo do gando».
Unha cortina de fume para tapar o apoio do PP ao tratado MERCOSUR
Segundo ADEGA, recentemente, a Xunta vén manobrando para poñer de novo o foco no suposto grave problema do lobo no medio rural. As declaracións alarmistas da conselleira sobre o risco para as persoas maiores ou os cans, que tentan crear unha falsa sensación de inseguridade no rural, son para ADEGA manobras da Xunta para distraer o sector gandeiro das súas políticas rurais regresivas. En particular, do seu apoio ao acordo MERCOSUR, que ameaza a gandería extensiva galega con importacións a baixos prezos e concorrencia desleal.
Os ecoloxistas sublilñan que esta estratexia comunicativa de cortinas de fume e bulos non fai máis que alimentar o conflito. Dificulta o poder chegar a unha coexistencia amigable entre as explotacións gandeiras e o lobo, ao torpedear a aplicación de solucións técnicas e científicas eficaces para acadar escenarios máis favorables e xustos. ADEGA avoga pola protección integral do lobo, «xoia sobranceira do noso patrimonio natural. Instamos ao TSXG a manter a suspensión cautelar da súa caza e á Xunta a que deixe de usar o lobo como chivo expiatorio co que ocultar as súas políticas trumpistas que levan ao abandono e desintegración do rural galego».
Outras novas
- ADEGA asegura que «a Xunta volve axitar o espantallo do lobo para tapar as súas miserias»
- Un choque en cadena de hasta 14 vehículos colapsa la AP-9
- Cortes y cambios de tráfico en Vigo
- La tasa de paro baja del 10% por segunda vez en 40 años
- A provincia de Pontevedra rozou os 1,8 millóns de visitantes en 2025, o seu mellor ano turístico
