| Este xoves, dacordo co pronóstico de MeteoGalicia, unha fronte moi activa atravesará Galicia durante a mañá, deixando ceos cubertos e chuvias localmente fortes na metade oeste da Comunidade. Co paso da fronte entrará o aire frío con chuvascos na segunda metade do día, ocasionalmente treboentos. A cota de neve baixará ós 1.000 metros pola noite. Os ventos soprarán do suroeste fortes, con refachos moi fortes no litoral e en zonas altas na primeira metade do día, virando a noroeste moderado pola tarde. As temperaturas sufrirán un lixeiro descenso con máximas de 14 graos en Vigo-con 8 de mínima-; 13 en Ferrol, A Coruña, Ourense e Pontevedra; 12 en Santiago e 10 en Lugo. |
A Xunta activou para este xoves un aviso laranxa por temporal costeiro que afecta desde a madrugada ao litoral oeste e noroeste da provincia da Coruña e que, co paso das horas, se estenderá ás Rías Baixas.
Segundo informou o Goberno galego, a Axencia Estatal de Meteoroloxía (AEMET) prevé mar combinado do noroeste con ondas que poden alcanzar os seis metros de altura, o que supón un risco importante tanto para a navegación como para a seguridade das persoas nas zonas costeiras.
Co obxectivo de previr incidencias, a Dirección Xeral de Emerxencias e Interior, dependente da Consellería de Presidencia, Xustiza e Deportes, comunicou a situación a través do Centro Integrado de Atención ás Emerxencias 112 Galicia aos concellos das provincias afectadas, ás deputacións, aos servizos provinciais, ás agrupacións de voluntarios de Protección Civil e a outros colectivos implicados, como os clubs náuticos.
Suspendida a actividade deportiva no mar
Como consecuencia do aviso laranxa, a Secretaría Xeral para o Deporte anunciou tamén a suspensión da actividade deportiva no mar nos municipios afectados, tanto a nivel federado como no marco do programa Xogade. As zonas concretas e os horarios nos que se aplica a suspensión poden consultarse na páxina web de Deporte Galego.
A Xunta insiste na necesidade de extremar as precaucións e lembra a importancia de manterse afastado da liña de costa, especialmente de diques, rompentes e paseos marítimos. Así mesmo, recomenda revisar os cabos e amarres das embarcacións e evitar calquera actividade no mar mentres se manteña o aviso activo.
Outras novas
- Tres grandes festivales gastronómicos, este verano frente al Náutico: vino, cerveza y sabores del mundo
- Caballero evita dar explicaciones al Pleno sobre la imputación de la concejala de Seguridad
- Vigo reduce su criminalidad un 4,2% y lidera el descenso de delitos entre las grandes ciudades gallegas
- El Gobierno local acusa al PP de Vigo de intentar sacar a la ciudad del Mundial 2030 compinchado con la Xunta y la RFEF
- Arrestado en Vigo, tras meses de investigación, por vender cocaína y drogas sintéticas en Sárdoma
