A portavoz nacional do BNG, Ana Pontón, avanzou este xoves en Vigo que a formación nacionalista levará ao Parlamento un paquete de propostas para garantir a atención sanitaria integral e pública das 600.000 persoas que integran a área sanitaria viguesa. Unha parte destacada desa poboación, arredor de 114.000 persoas, ten como hospital de referencia Povisa, centro xestionado polo grupo privado Ribera Saúde, sobre o que nos últimos meses transcenderon informacións que cuestionan a primacía da atención ás e aos pacientes fronte aos intereses económicos.
Pregunta a Rueda se pode garantir que a atención sanitaria está,en Povisa,por riba da rendibilidade
Pontón fixo referencia aos audios do CEO do grupo Ribera, difundidos recentemente, nos que instaba a priorizar beneficios por riba da calidade asistencial no hospital privatizado de Torrejón de Ardoz. Para a líder nacionalista, estas declaracións confirman unha dinámica que o BNG leva anos denunciando: “Cando a sanidade se converte nun negocio, as empresas non ven pacientes, ven clientes”, afirmou. Nesta liña, preguntou ao presidente da Xunta, Alfonso Rueda, se pode garantir que a atención sanitaria das persoas atendidas en Povisa non está condicionada por criterios de rendibilidade.
A comparecencia, realizada ás portas de Povisa xunto ao portavoz municipal Xabier Pérez Igrexas, a responsable parlamentaria de Sanidade Montserrat Prado e representantes da organización en Vigo, serviu para presentar tres medidas que o BNG defenderá no Parlamento.
Incorporación de Povisa á sanidade pública galega
A primeira delas é a garantía plena de atención pública para toda a cidadanía da área sanitaria, o que, segundo Pontón, require que a Xunta estude a incorporación de Povisa á rede pública mediante a compra do hospital. A líder nacionalista sostén que só desa forma se asegurarían prestacións homoxéneas, de calidade e con criterios exclusivamente sanitarios.
Outras novas
- Gondomar apuesta por el bienestar animal con ‘Proyecto Gato’ y ‘Bai Sen Pulgas’
- Pontón reclama garantías de atención sanitaria pública para as 600.000 persoas da área de Vigo
- «Le doy unos días a la Diputación para firmar el convenio de la piscina de Teis, o la pagamos sólo nosotros»
- Delegados de CIG-Ensino e STEG péchanse en Educación esixindo unha reunión co conselleiro
- A Tarxeta Xente Nova contribúe ao fomento do acceso ao transporte público
Transparencia
En segundo lugar, o BNG reclamará que se faga público o contrato millonario entre o Sergas e Povisa, que a formación cualifica de “ocultado” e “blindado”. Pontón lembra que o convenio supera os 100 millóns de euros anuais e denuncia “oscurantismo” á hora de coñecer as súas condicións, contraprestacións e cláusulas, algo inaceptable nun servizo financiado con fondos públicos.
Auditoría externa
A terceira medida consiste na realización dunha auditoría externa e independente que avalíe tanto as prácticas de xestión como a calidade asistencial do hospital. Pontón quere esclarecer se condutas denunciadas en Torrejón —como o incremento artificial das listas de espera ou a negativa a atender pacientes non rendibles— se producen tamén en Povisa. Ademais, o BNG demanda facer públicos datos clave como as ratios entre profesionais e pacientes, os custos asumidos pola Xunta en materia de farmacia, próteses ou listas de espera, e o impacto total destes gastos sobre o erario público.
A portavoz resumiu o obxectivo das propostas: “Defender o dereito á saúde por riba do negocio e garantir transparencia nun contrato sanitario dos máis caros do Estado”. Recordou tamén que a área sanitaria de Vigo xa sufriu “experimentos privatizadores” no pasado, como a construción do hospital Álvaro Cunqueiro baixo un sistema de colaboración público-privada que supuxo un sobrecusto de 470 millóns de euros para obter “un hospital máis pequeno e con menos servizos dos previstos”.
Pontón concluíu apelando á defensa firme da sanidade pública como único modelo capaz de garantir equidade, universalidade e atención centrada nas persoas: “A sanidade pública é a única que asegura que todas e todos sexamos tratados como pacientes, non como clientes”.
