O transporte público leva anos transformándose nun servizo pensado para facilitar a vida das persoas, apostando por favorecer a conexión e a comodidade. Con este propósito, os galegos e galegas teñen acceso a bonificacións que permiten simplificar a compra de billetes no transporte público de competencia autonómica, a prezos asequibles.
A través destas tarxetas —Xente Nova, +65 e a Tarxeta de Mobilidade de Galicia— a Xunta está a impulsar tarifas que poñen no centro ás familias, á mocidade e ás persoas maiores, reducindo custos, ampliando dereitos e promovendo unha mobilidade máis sostible en todo o territorio.
Xente Nova: mobilidade gratuíta
A tarxeta Xente Nova, destinada a menores de 21 anos, permite realizar ata 60 viaxes ao mes completamente de balde en autobuses interurbanos da Xunta e noutros medios de transporte como o tren de proximidade en Ferrol ou o transporte marítimo, na ría de Vigo.
Isto non só garante prezos económicos para estudantes e mozos traballadores, tamén contribúe a educar ás novas xeracións nun uso máis responsable e sostible do transporte público. Co paso dos anos, converteuse nun apoio a economía das familias falegas, que nos tres primeiros trimestres deste ano aforraron case 8,8 millóns de euros -e máis de 50,2 millóns desde que esta bonificación, co-financiada entre Xunta e Estado, se puxo en marcha en 2016-.
Así, ao mesmo tempo a Tarxeta Xente Nova está a ser un catalizador directo da demanda no transporte interurbano: ata setembro rexistráronse case 4,9 millóns de viaxes gratuítas, 12.000 máis que no mesmo tramo de 2024, cunha media mensual que superou as 540.000 viaxes. En 9 anos ese número de desprazamentos superou os 33,5 millóns.
Estes datos explican que ata o mes de setembro houbese máis de 132.000 tarxetas activas, e que só dende xaneiro sumáranse máis de 20.000 novos usuarios. Esta boa acollida levou á Xunta a ampliar o programa para o próximo ano 2026.
Tarifa+65: facilitar a vida das persoas maiores
Nesa mesma liña, a poboación maior de 65 anos, conta coa tarifa +65 que ofrece tamén 60 viaxes gratuítas ao mes, abrindo portas a un envellecemento activo e conectado. Ir ao médico, visitar familiares, participar en actividades sociais ou simplemente moverse pola súa contorna deixan de ser tarefas condicionadas polo custe económico.
A medida mellora a calidade de vida das persoas maiores e fomenta a súa autonomía, contribuíndo a combater a soidade e a garantir un acceso máis igualitario aos recursos da comunidade.
Tarxeta de Mobilidade de Galicia: descontos para toda a cidadanía
A Tarxeta de Mobilidade de Galicia, mediante bonificacións, permite combinacións máis baratas e flexibles, favorecendo os desprazamentos diarios por motivos de traballo, estudos ou saúde.
Beneficios sociais e impacto real
O éxito destas tarxetas non se mide só en cifras, senón no impacto social que teñen:
- Alivio económico real para miles de familias galegas.
- Mobilidade garantida para colectivos con máis necesidades: mocidade e persoas maiores.
- Fomento da sustentabilidade ao reducir o uso do vehículo privado.
- Revitalización do transporte público, que gaña usuarios e reforza o seu papel como servizo esencial.
- Cohesión territorial, facilitando a vida en cidades, vilas e zonas rurais.
Un camiño que segue medrando
Na actualidade, os galegos avanzamos cara a un modelo de transporte público máis humano, máis próximo e máis igualitario. As bonificacións non son só unha ferramenta de aforro, senón unha aposta polo obxectivo de que as persoas sexan o centro das políticas públicas. A extensión destas medidas e a súa mellora continua avanzan tamén en lograr unha mobilidade accesible para todas e todos.
