O pleno municipal de Gondomar aprobou o inicio dos trámites para crear a Área Territorial de Prestación Conxunta (ATPC) do servizo de taxi no Val Miñor, unha decisión que abre a porta a unha xestión compartida entre Gondomar, Nigrán e Baiona. O obxectivo desta figura é coordinar o servizo, unificar tarifas e mellorar a organización das licenzas nunha comarca cunha elevada mobilidade interna e forte presión turística.
A posta en marcha da ATPC responde a unha demanda trasladada desde hai anos tanto por usuarios como por profesionais do sector, que veñen reclamando unha maior coordinación entre concellos para evitar solapamentos, falta de taxis en horas punta e diferencias de tarifas entre municipios.
Servizos compartidos
O alcalde de Gondomar, Paco Ferreira, defendeu no pleno a necesidade de avanzar cara a unha maior cooperación supramunicipal, advertindo de que, sen unha aposta decidida polos servizos compartidos, a Mancomunidade podería perder sentido como instrumento de xestión. Nesta liña, chegou a poñer enriba da mesa a posibilidade de abandonar a Mancomunidade se non se producen avances reais na prestación conxunta de servizos.
Primeira fase
A medida marca un primeiro paso administrativo, pero o proceso aínda deberá superar diferentes fases, incluíndo informes técnicos, alegacións e a coordinación co resto dos concellos implicados. Entre as cuestións pendentes figuran os prazos de implantación efectiva, o modelo definitivo de tarifas e o número total de licenzas que integrarán a futura área única.
Por agora, a creación da ATPC non supón cambios inmediatos no funcionamento do servizo, aínda que abre un escenario novo para a organización do transporte público en taxi no Val Miñor.
