A nosa compañeira Pily Reñones recibiu o título de Fotógrafa Internacional Distinguida en Fine Art, outorgado pola APPIMAGEM, a Asociación de Fotógrafos Profesionais de Portugal. A entrega celebrouse nunha cena de gala no Gran Casino de Espinho, á que asistiron profesionais de distintas nacionalidades.
O recoñecemento baséase nos méritos das obras presentadas anualmente ás calificacións portuguesas, avaliadas por xurados nacionais e internacionais, cunha puntuación de cero a cen, sendo consideradas meritorias aquelas con 80 ou máis.
Mestra e especialista en retrato
Reñones, que xa contaba con outros títulos en Portugal como Mestra e Fotógrafa especialista en retrato, destacou a súa satisfacción por este novo recoñecemento na fotografía artística, unha das súas grandes paixóns. A fotógrafa anunciou que, tras este logro, centrará os seus esforzos en un novo proxecto: converterse en especialista en fotografía documental, unha disciplina na que se sente especialmente libre para «contar ao mundo dibuxando con luz o que os seus ollos contemplan».
«Ver a fotografía con máis luz»
Ao longo da súa carreira, a nosa compañeira recibiu diversos premios que avalan o seu talento na fotografía documental, con obras realizadas en diferentes países. A fotógrafa de Tomiño cualificou este último recoñecemento como «unha adrenalina que a impulsa a seguir crecendo profesionalmente«, e agradeceu á APPIMAGEM a oportunidade de ampliar os seus coñecementos e «ver a fotografía con máis luz».
