O alcalde do Porriño, Alejandro Lorenzo, presentou esta mañá os proxectos que o Concello levará ante a Deputación de Pontevedra para optar ás diferentes liñas de axuda correspondentes aos exercicios 2026 e 2027. En total, as actuacións previstas supoñen un investimento que supera os 5 millóns de euros, financiados de maneira conxunta pola Deputación e o Concello, co obxectivo de mellorar a calidade de vida da veciñanza e reforzar a cohesión territorial do municipio, con especial atención ás parroquias.
Torneiros
Entre as principais intervencións destaca o proxecto de rexeneración urbana do núcleo de Torneiros, enmarcado no Plan Provincia Extraordinaria – Plan Extra. A iniciativa, cun investimento inicial de dous millóns de euros, busca mellorar o medio ambiente urbano e fomentar a mobilidade peonil mediante a redistribución do espazo viario. Prevese a ampliación das zonas peonís, a mellora das beirarrúas e da iluminación, a eliminación de barreiras arquitectónicas e a incorporación de vexetación e mobiliario urbano.
Velódromo
Outra das actuacións máis relevantes é a remodelación integral do velódromo municipal, no marco do Plan Extraordinario de Infraestruturas Deportivas. Con 600.000 euros de investimento, o Concello aposta por converter este espazo, inaugurado en 1993 e único en Galicia, nun centro de referencia para os deportes urbanos. O proxecto inclúe a construción dun skatepark e dun pumptrack, así como melloras nas gradas, fachadas e paramentos interiores, habilitando locais para clubs e asociacións. Tamén se contempla a instalación de nova iluminación, sistemas de pluviais e rega, e novo mobiliario urbano, garantindo un espazo seguro, accesible e integrador.
Outras novas
- O Porriño presenta ante a Deputación de Pontevedra proxectos por máis de 5 millóns
- El sacerdote y periodista español Antonio Pelayo, acusado en Roma de presunta agresión sexual
- Caballero carga contra Louzán: “sigue intentando que Vigo no sea sede del Mundial y se apoya en mentiras”
- Muere el golpista Tejero
- Las pistas de atletismo de Balaídos no reabren el día anunciado por el Concello
Servizos do rural
Ademais, o Concello presentará proxectos no marco do Plan + Provincia, destinados a reforzar os servizos básicos no rural, con especial prioridade na rede de saneamento, unha demanda histórica da veciñanza. Tamén se incluirán obras de acondicionamento, asfaltado e mantemento da rede viaria municipal, co propósito de mellorar a mobilidade, a seguridade e a conectividade entre os distintos núcleos de poboación.
Xunto a estas actuacións, a Deputación de Pontevedra subvencionará tamén o acondicionamento dunha senda peonil na estrada provincial do barrio de Casal, na parroquia de Budiño.
