O presidente da Deputación de Pontevedra, Luis López, e a alcaldesa de Redondela, Digna Rivas, veñen de asinar o convenio de colaboración para executar o proxecto de humanización e instalación dun ascensor na Praza da Petanca. Un acordo asinado no marco do Plan Extra, o novidoso plan de investimentos do goberno provincial que mobiliza ata 38 millóns de euros entre os concellos de menos de 50.000 habitantes da provincia para executar proxectos estratéxicos.
670.000€
López e Rivas selaron un acordo a través do cal o organismo provincial achega 670.000€. De acordo co reparto do Plan Extra, ao Concello de Redondela corresponderíalle unha subvención máxima de 1,1 millóns, pero o Concello presentou un proxecto cun orzamento de 956.700€, polo que para dar cumprimento aos criterios de confinanciamento das bases do Plan Extra a achega do organismo provincial non podería ser superior ao 70 % do total. O 30 % restante, uns 287.000 euros, asúmeo o Concello.
Praza da Petanca
O proxecto de humanización da Praza da Petanca de Redondela ten como obxectivo revitalizar e renovar un espazo actualmente relegado a zonas de paso, dando uniformidade á toda a praza e aproveitando o
desnivel da parcela posterior para a construción dunha bancada e a creación dun auditorio ao aire libre.
As actuacións a realizar inclúen a preparación do terreo e a retirada do mobiliario existente para, a
continuación, aplicar as capas de formigón precisas e a colocación de céspede nas zonas verdes con
plantación de arborado. Así mesmo, instalarase un ascensor para salvar o desnivel da parcela e novo
mobiliario urbano con bancos, fontes e aparcabicis. A actuación completarase coa canalización das redes
eléctricas e a implantación de iluminación LED.
2,16 millóns para Redondela
A colaboración da Deputación co Concello de Redondela non se limita unicamente ao Plan Extra. O Concello ten previsto recibir este ano de mans do organismo provincial máis de 2,16 millóns de euros a través de programas do servizo de Cooperación como o Plan +Provincia e o Plan Extraordinario de Infraestruturas Deportivas.
