Advirten de que o investimento non pode considerarse ambientalmente sostíbel
Cincuenta e dúas Organizacións Non Gobernamentais ambientais dos cinco continentes remitiron cartas ás consellerías de Medio Ambiente e Industria da Xunta de Galicia, así como aos ministerios de Transición Ecolóxica e Industria, solicitando a paralización definitiva do proxecto de fábrica de celulosa e fibras de eucalipto de Altri/Greenfiber en Palas de Rei (comarca da Ulloa, Lugo).
Así, as entidades forman parte da Environmental Paper Network (EPN), unha rede internacional moi influente en cuestións de sustentabilidade da pulpa e o papel ao longo da cadea de subministración global e o ciclo de vida do papel. EPN naceu en 2002 co obxectivo común de camiñar cara a unha industria forestal, de pulpa e papel que contribúa a un futuro saudábel, xusto e sostíbel para toda a vida na Terra.
Impacto na biodiversidade de espazos de gran valor
Nas mencionadas cartas, as organizacións asinantes desaconsellan a implementación do proxecto de Altri e solicitan que se desestime definitivamente. Entre outras cuestións, chaman a atención sobre os impactos que provocaría:
- na contorna natural na que se vai a situar a fábrica
- na biodiversidade de espazos de gran valor
- nas especies vulnerábeis e en perigo de extinción
- no patrimonio cultural
- nos sectores primarios locais
- nos recursos hídricos e
- na saúde das persoas nun amplo radio de acción
Deterioro de masas forestais autóctonas
Ademais, estas entidades tamén chaman a atención sobre o proceso de ‘eucaliptización’ que sufriu Galicia xunto ao centro e norte de Portugal, fenómeno que consideran «insólito en Europa». Ao seu xuízo, esta situación provocou unha enorme perda de biodiversidade e unha importante deterioración da integridade ecolóxica da rexión, afectando radicalmente ás masas forestais autóctonas e a moitos outros hábitats de alto valor que necesitan conservación.
De igual xeito, os asinantes da CARTA tamén expresan as súas dúbidas sobre a efectividade das actuais moratorias a novas plantacións de eucalipto que existen en Galicia e Portugal, cuxo obxectivo debe ser limitar a súa expansión.
Tamén en vigoalminuto
- Críticas ao incremento das achegas do Concello á Igrexa Católica
- KLM conectará Santiago de Compostela con Ámsterdam, a partir del próximo verano
- En peligro 1,9 millones recibidos por el Concello para bonificar viajes en Vitrasa
- Vigolandia vuelve al IFEVI con cinco días de ocio infantil, grandes hinchables y animación
- Arranca la instalación de gradas en el parque Nelson Mandela de Navia
- Seis detenidos por lesiones, tras una violenta pelea en una vivienda ocupada en Vigo
Non cumpre as condicións para financiarse con cartos públicos
Nesta liña, as ONG tamén apuntan a que «o proxecto non reúne as condicións para seguir adiante nin para financiarse con diñeiro público a través dos fondos europeos Next Generation, xa que é contrario aos obxectivos de sustentabilidade dos mesmos«. En concreto, denuncian, mentres que un dos obxectivos destes fondos é «mellorar a calidade da auga dos nosos ríos e mares e reducir os residuos«, o proxecto empeorará aínda máis a calidade da auga do río Ulla. Tamén empeorará a sobresaturación da industria da pulpa e o papel nesta rexión.
Habería que facer o contrario: reducir a superficie de eucalipto
En troques, continúan, «deberiamos ir na dirección contraria: reducir a superficie de eucalipto tal e como esixe o Plan Forestal Galego actualmente en vigor, avanzar cara á redución global da produción e o consumo de papel, promover os envases reutilizábeis, maximizar o contido de fibra reciclada nos produtos papeleiros, incrementar o uso doutros materiais recuperados e acabar co uso de fibras procedentes de bosques e selvas ameazadas, ecosistemas e hábitats de alto valor en materia de conservación, tendendo a fabricar fibras de nova xeración e non a partir de madeira«.
