A alcaldesa de Mos vénlle de entregar á presidenta da Asociación Cultural Tangaraño, Kari Cabezas, as chaves do edificio das Antigas Escolas Unitaria de Dornelas, cedidas á Asociación tras a sinatura dun convenio de colaboración co Concello.
Deste xeito Tangaraño conta agora con estas intalacións de 150m2 de superficie máis 37m2 de aparcadoiro, para o seu uso.
Nidia Arévalo e a concelleira de Cultura, Sara Cebreiro, declararon a este respecto que “cedémoslle a Tangaraño este local municipal para que poidan levar a cabo as súas actividades centradas na divulgación dos diferentes aspectos da nosa cultura e os nosos costumes, a través de cursos de percusión e canto, baile, iniciativas etnográficas, galas, eventos solidarios ou proxectos didácticos.”
Ademais, a alcaldesa engadiu que “a concesión do uso privativo das Antigas Escolas de Dornelas a Tangaraño ten un período de vixencia de cinco anos, ata xullo de 2029, puidendo ser renovable por un novo período de 5 anos máis, segundo acordo de ambas partes”.
25 anos
A Asociación Cultural Tangaraño, que está a celebrar o seu 25 aniversario, nace en 1999 en Mos, proxecto de 20 persoas dirixido por Kari Cabezas. Tangaraño xurde do baile; e ao redor deste, marca os seus obxectivos, facendo convivir dous estilos diferentes e afastados: o tradicional e coreográfico, pasando a ser o selo de identidade do grupo. Actualmente a asociación está formada por 40 compoñentes, que forman parte dos grupos de música e de baile:
- Grupo de baile Tangaraño.
- Grupos de música e canto:
- • pandereteiras Meigas Fóra
- • pandereteiros Os Tangaraños
- • grupo de gaitas, saxo e percusión, Os ruidosos de Tangaraño
- • Escola de baile.
