A Xunta de Galicia publicará este luns a listaxe provisional de admitidos nas súas escolas infantís para o curso 2024-2025, que se poderá consultar na páxina web da Consellería de Política Social e Igualdade . A partir do martes día 7 de maio e a ata o luns 13 abrirase un período para presentar alegacións.
As listaxes definitivas de admitidos nas máis de 170 escolas infantís da rede pública autonómica daranse a coñecer o día 31 deste mesmo mes, logo de facer o cribado de solicitudes dun mesmo neno para varias escolas.
Unha vez publicada a relación de admitidos, as familias terán de prazo do 1 ao 14 de xuño para formalizar a matrícula dos seus fillos. O inicio do curso nos centros de 0 a 3 anos da Xunta está fixado para o 6 de setembro.
Gratuidade
No curso 2024-2025 a atención educativa será gratuíta para o 100% do alumnado en todas as escolas infantís de Galicia durante 8 horas ao día e 11 meses ao ano, tanto nas que forman parte da rede pública da Xunta como nas que dependen dos Concellos, nas de iniciativa social e nas privadas adheridas ao programa de gratuidade.
Vigo: becas de libros, comedor e material escolar
Doutra banda, o Concello aprobou as bases e a convocatoria das bolsas de comedor, libros e material escolar para o curso 2024-2025. As axudas ascenden a 1.427.700€, cantidade á que hai que sumar os 600.000€ que recibe Foanpas.
Polo miúdo, o curso actual, o Concello de Vigo destinou 1.292.700€ ás axudas de comedor e 135.000€ a material escolar e libros. En total, concedéronse 4.000 bolsas de comedor na convocatoria en vigor cunha dotación de 45€ por beneficiario ao mes.
