A partir deste mércores, día 17, entrarán en servizo tres novos ramais do enlace de conexión da autovía Tui-A Guarda entre os enlaces coa autovía A-55 e de Areas. En concreto, son os de saída do enlace do punto quilométrico 30 da autovía A-55, e o ramal directo entre a nova glorieta das estradas N-551 e PO-552 e a glorieta elevada.
A execución do novo enlace na A-55 serve para dar conexión coa futura vía de altas prestacións Tui-A Guarda, así como coas estradas N-551 e a PO-552.
Xa finalizados
Así, unha vez finalizados os traballos dos novos ramais de saída 30 da autovía A-55, configurando un novo enlace sentido Portugal-Tui/O Porriño e Tui/O Porriño-Portugal, na súa calzada esquerda e dereita, prevese poñer en servizo os ditos novos ramais.
Iso si: manterase en servizo o novo ramal de entrada á autovía desde o enlace sentido Portugal-Tui, calzada decrecente. Deste xeito, todos os ramais do treito da autovía Tui-A Guarda entre os enlaces da A-55 e de Areas estarán en servizo, agás o novo ramal de entrada á autovía desde o enlace en execución, en sentido Portugal.
A súa construción, cuxos traballos non era posible acometer ata a entrada en servizo do ramal de saída, prevese que faga nun tempo inferior a un mes (dependendo sempre das condicións meteorolóxicas).
Novos movementos da circulación
Doutra banda, a posta en servizo dos tres novos ramais do enlace de conexión da autovía Tui-A Guarda entre os enlaces coa autovía A-55 e de Areas implicarán novos movementos do tráfico e a mellora da circulación.
No caso concreto do novo ramal de saída da autovía ao enlace, no sentido Portugal-Tui, calzada decrecente, deixará de ser necesario facer o cambio de sentido na saída posterior da autovía (29 AB) para incorporarse de novo á autovía A-55 sentido Portugal. Este ramal funciona xa coa súa configuración definitiva, e para ir a Tui desde a glorieta elevada sobre a autovía collerase a primeira saída.
Para a circulación polo novo ramal de saída da autovía ao enlace no sentido Tui-Portugal, calzada crecente, hai unha nova saída, anterior á que está actualmente en servizo. Deste xeito, poderase cortar a saída actual para poder executar o novo ramal de entrada á autovía sentido Portugal, que é o que falta por acometer.
Finalmente, o tráfico polo novo viario directo de conexión da glorieta elevada coas estradas N-551 e PO-552, conecta a nova glorieta das estradas N-551 e PO-552 coa glorieta elevada sobre a A-55. Isto diminuirá o tráfico de paso no polígono de Areas, xa que evita aos usuarios da vía o ter que acceder ao polígono para chegar á autovía A-55.
