Xa podes empregar o ‘Bono Deporte’ en 150 establecementos da área da nosa cidade que están adheridos á campaña da Xunta para familias con nenos e nenas de 6 a 16 anos, con licenza federada ou do Programa Xogade.
Ata o 1 de xullo
A delegada autonómica na cidade lembrou de que as solicitudes para recibir a axuda poderán realizarse ata o 29 de febreiro e os bonos descargados poderán empregarse ata o 1 de xullo. Ademais, salientou, trátase dun sistema que funciona a través dunha App, de maneira que o importe de 120€ de cada bono contará cun desconto do 80% en cada compra ou servizo adquirido e irase consumindo en función do valor da compra.
Como informara vigoalminuto, o ‘Bono Deporte’ pechou o pasado 2 de xaneiro o período de adhesión de establecementos comerciais ou entidades prestadoras de servizos á campaña.
Como empregar o bono?
Se queres consultar a listaxe destes establecemento só tes que entrar en bonodeporte.gal, na que tamén se recolle toda a información sobre o procedemento a seguir para poder realizar desde hoxe a descarga dos bonos.
Así, o primeiro paso para empregar o ‘Bono Deporte’ consiste en darse de alta nesa web; unha vez recibido un SMS de validación, xa se poderá activar e descargar en formato dixital a través dun código QR. Cada beneficiario disporá como máximo dun único bono por menor que se poderá descontar amosando o código QR no momento do pago nos establecementos comerciais e entidades deportivas. A entidade accederá á aplicación que, sobre o importe total, validará e calculará o prezo final co desconto.
