O presidente da Xunta anunciou que as familias poderán descargar a partir do 8 de xaneiro o Bono Deporte de 120€. Poderán acceder as que teñan fillos, de entre 6 e 16 anos, que estean federados ou inscritos no programa escolar de fomento da actividades deportivas Xogade. O obxectivo “é chegar a 135.000 rapaces e rapazas” para o que o Goberno galego vai investir “máis de 16 millóns de euros”.
Alfonso Rueda adiantou esta nova nunha visita a dous pavillóns deportivos do Porriño e subliñou que o Bono Deporte vai axudar ás familias a sufragar o 80 % das compras en material de equipamento ou do custe da asistencia a clases de actividades deportivas. O obxectivo é promover a práctica de exercicio entre os máis cativos. “Se fomentamos o deporte e conseguimos que o ocio de moitos rapaces -agora que hai moitas alternativas- sexa o deporte, estaremos facendo algo bo”, indicou o presidente.
Poderá empregarse ata o 1 de xullo de 2024
Cada familia poderá descargar un Bono Deporte por cada un dos fillos ou fillas e poderán facer uso del ata o 1 de xullo. Onte o Diario Oficial de Galicia publicaba a convocatoria das axudas, así como as condicións e prazos para as entidades que se queiran unir ao programa. Poderán facelo desde este martes, día 12, ata o 30 de decembro.