A Asociación de Nais e Pais (ANPA) de alumnos do CEE Saladino Cortizo, vén de expresar a súa indignacién e preocupación pola ausencia da especialista en Audición e Linguaxe. O centro carece del dende principio de curso e a ANPA presiona á Dirección do centro para que o alumnado do ciclo de Tránsito á Vida Adulta reciba ese servizo adecuadamente.
“Dende o centro comunícanos que está solicitado tanto en inspección como na xefatura territorial [da Consellería de Educación] e que de momento non teñen resposta”, apuntan dende a ANPA. Con todo, engaden, tamén din que a ratio está cuberta, non así as necesidades. “Necesidades que son imprescindibles nun alumnado que non só ten carencia verbal senón tamén motriz“.
O trimestre perdido
Asimesmo, nais e pais aseguran que o trimestre está perdido e que o alumnado non está recibindo un servizo que lle corresponde. “Non esquezamos que estamos a falar do único centro Público de Educación Especial do Sur de Pontevedra“, subliñan.
Falla de vontade
Para a ANPA, dicir que non se cubre porque non existe a figura de comisión de servizo para aquelas persoas que se forman en cursos, “pagados pola administración”, en sistemas de comunicación alternativos tanto visual, auditivos e táctiles e que non poden solicitar esas prazas “vacantes”, sen adxudicar porque non están convocadas, nin existen,” é tirar pedras contra o noso propio tellado”.
Asi, subliñan, “hai xente formada coma a persoa que desempeñaba ese traballo ata o de agora, pero non hai vontade de facilitar que estas persoas traballen e ocupen estas vacantes, xa que tan só se pensa en aforrar cartos e tratar ás crianzas que se forman neste Centro coma meros números”.
Denigrante
As nais e pais entenden que “é denigrante” que un centro de educación teña estas carencias tan elementais para que nalgún momento poidan desenrolarse e comunicarse de forma autónoma. Esta vacante sen cubrir de Audición e Linguaxe súmase a ausencia da Traballadora Social que fai dous anos sacaron do Centro. “Unha figura fundamental para este centro que segue sen existir e que imposibilita que a maioría das familias vulnerables do centro que son case a metade das nosas familias asociadas poidas ter o dereito de asesoramento claro e directo, polo que son as rapazas e rapaces do centro quenes pagan a súa ausencia”.
É por todo isto que dende a ANPA aseguran sentirse “defraudados polo Conselleria de Educación que non entenden as necesidades ESPECIAIS dun centro de Educación Especial”.
