A Sede de Afundación en Vigo acollerá entre os meses de setembro e outubro cinco congresos que reunirán profesionais de prestixio nacional e internacional en ámbitos diversos como a tecnoloxía, o sector pesqueiro, a educación ou a empresa.
PulpøCøn23
A primeira cita, o PulpøCøn23, arrincará este xoves, día 7, e reunirá ata o sábado 9 membros da comunidade de desenvolvedores de Galicia e a súa área de influencia. En total, participarán en 14 charlas e 12 talleres sobre o movemento crafter e o clean code. Relatores de prestixio nacional e internacional abordarán as distintas técnicas, arquitecturas e modelos.
XI ANFACO World Tuna Conference
O 14 e 15 de setembro celebrarase a XI ANFACO World Tuna Conference, enmarcada no Foro Internacional de Conservación de Produtos de Pesca de Galicia. Baixo o epígrafe de «Liderando en tempos incertos», reunirá en dúas xornadas 400 directivos de empresas atuneiras dos cinco continentes, convertendo a Vigo na capital mundial do sector atuneiro, conserveiro e transformador de produtos do mar. Paralelamente á celebración da conferencia instalaranse 10 casetas para a exposición dos produtos de distintas empresas.
Conxemar-FAO
O 2 de outubro terá lugar o XI Congreso Internacional Conxemar-FAO, un evento que se consolidou como unha das citas fundamentais para empresas transformadoras e comercializadoras do mar en todo o mundo. O seu obxectivo é analizar os retos actuais da industria comercializadora e transformadora de produtos do mar e o seu compromiso coa sostibilidade.
Star Scholars UNESCO Chair Global Conference
Os días 9 e 10 de outubro celebrarase a Star Scholars UNESCO Chair Global Conference 2023, promovida conxuntamente por Red Star Scholars e a Cátedra UNESCO da Universidade de Vigo. Un lugar de encontro para académicos e profesionais innovadores de todo o mundo no que se abordarán prácticas educativas transformadoras e que ofrece aos participantes a oportunidade de crear redes de investigación e aprendizaxe permanentes.
Empresarias de Galicia
Para finalizar outubro, o día 24 Empresarias de Galicia celebrará o seu VII congreso, «Acción e implicación», dirixido a todo o sector empresarial de Galicia, co obxectivo de visibilizar e promocionar o papel da muller no ámbito empresarial e social.
