O Bloque Nacionalista Galego denuncia que o Goberno de Abel Caballero «incumpre a lei negándose a constituír a Comisión de Vixilancia da Contratación», obrigatoria en base ao Regulamento Orgánico do Pleno e á normativa estatal.
Así quedou en evidencia, sinala o voveiro do BNG, este luns no Pleno de Organización do Concello de Vigo. No mesmo, o grupo socialista rexeitou os catro votos particulares formulados polo Bloque para «democratizar» a proposta do Goberno municipal, que impuxo sen diálogo coas forzas oposición un funcionamento que non garante un reparto «proporcional e xusto».
«Que é o que quere esconder Abel Caballero? «
«Que é o do que non quere que nos enteremos a oposición?», interpelou Xabier P. Igrexas na sesión de hoxe, logo da negativa a constituír esa Comisión de Vixilancia da Contratación. Así, o» voceiro nacionalista advertiu de que esa decisión «supón vulnerar novamente a lexislación, como ocorreu no mandato anterior», restrinxindo a capacidade da oposición para fiscalizar as contratacións. «Se cadra teñen algo que meter debaixo da alfombra«, alertou.
‘Paseo militar’
Igrexas creticou que dende o inicio da sesión plenaria o grupo socialista quixera convertela nun «paseo militar» para evitar o debate. «Terá o alcalde algún tipo de selfie en axenda para que non queira que este Pleno se desenvolva coa mesma normalidade que noutras ocasións«, ironizou Igrexas. Nese sentido, criticou que o alcalde tentara limitar o tempo de intervención do portavoz do BNG a 2 minutos que, tras a protesta e ser corrixido polo Secretario municipal, se mantivo nos 5 minutos que estabelece o regulamento.
Sin nomear os representantes na Xerencia de Urbanismo, IFEVI ou Zona Franca
Dende o BNG lamentaron tamén que o grupo socialista deixara fóra da orde do día do Pleno de Organización, que se convocou sen ter celebrado a preceptiva Xunta de Voceiros, algunhas cuestións da «maior relevancia» para a cidade, como a designación de membros para diferentes órganos como a Xerencia Municipal de Urbanismo, o Ifevi, a Zona Franca ou os padroados dos museos Marco e Quiñones de León, entre outros. Unha omisión que motivou un escrito da fronte nacionalista reclamando a súa incorporación nos asuntos a aprobar ao que Abel Caballero limitouse a contestar cun «tomamos nota».
«Rodete antidemocrático»
Igrexas asegurou que este Pleno constatou como «o Goberno de Abel Caballero impón o rodete antidemocrático» na organización do Concello, tal e que advertira o propio BNG nos pasados días. «O grupo de Goberno non tivo a máis mínima intención de dialogar para garantir uns mínimos democráticos no funcionamento do Concello, que respecten a pluralidade das viguesas e dos vigueses expresada nas urnas 28 de maio», cuestionou.
Nesa liña, lembrou que «o Concello non é do grupo de Goberno» e asegurou que o papel fundamental que xoga a oposición queda restrinxido con este reparto. Así, mentres o grupo socialista disporá de 5 mocións por Pleno, o conxunto da oposición tan só poderá formular 2.