Vigo al minuto

Piden a retirada do protocolo que deriva as consultas pediátricas por teléfono na área de Vigo

Aplicable cando non haxa médicos nos centros de saúde

Piden a retirada do protocolo que deriva as consultas pediátricas por teléfono na área de Vigo

Aplicable cando non haxa médicos nos centros de saúde

O Bloque Nacionalista Galego esixe a retirada do protocolo que deriva as consultas pediátricas por teléfono cando non haxa profesionais dispoñíbeis nos centros de saúde da área de Vigo. Así, o BNG vén de rexistrar iniciativas no Parlamento de Galicia para que a Xunta dea marcha atrás nesta decisión que “pon en risco a saúde” das nenas e nenos e para que tome medidas urxentes que garantan a atención por especialistas en Pediatría de forma presencial en todos os centros de saúde.

‘Desmantelar’ a Atención Primaria

“Non imos aceptar que a Xunta do PP pretenda cruzar unha nova liña vermella na súa folla de ruta para desmantelar a Atención Primaria, denunciou a portavoz de Sanidade do BNG, Montse Prado, nunha rolda de prensa celebrada este mércores xunto co concelleiro e candidato nacionalista á Alcaldía de Vigo, Xabier P. Igrexas, e as deputadas Carmela González e Alexandra Fernández.

Protocolo remitido aos centros de saúde

Prado reclamou así que se retire este protocolo, remitido pola Xerencia da Área Sanitaria aos centros de saúde de Vigo, e rexeitou os “matices” anunciados polo Servizo Galego de Saúde (Sergas) ao documento. “Non se pode valorar e auscultar a un pequeno por teléfono nin pedir que o persoal de Enfermería ou do mostrador diagnostiquen e decidan a urxencia de cada caso”, cuestionou, de vez que advertiu que esta decisión deixa tamén “vendido e sen soporte legal” ao persoal.

En 200 concellos non hai pediatra

“Esta circular non é unha ocorrencia de última hora, senón un paso máis na voadura programada do PP contra a sanidade pública, afirmou a voceira do Bloque. Subliñou como causa os continuados recortes e falla de investimentos en Atención Primaria, que sitúan Galicia na penúltima posición do Estado, e provocan que en 200 concellos galegos non haxa na actualidade ningún pediatra nos centros de saúde.

Nese sentido, o BNG demanda nas súas iniciativas que a Xunta deixe de ocultar os datos e informe sobre o número total de pediatras en activo, cantas prazas están vacantes e cantos profesionais próximos á xubilación. “Non podemos continuar derivando casos que tiñan que resolverse en Atención Primaria pasa saturar máis o PAC ou as Urxencias Pediátricas dos hospitais”, remachou.

3.600 nenas en nenos sen pediatra na área de Vigo

Na mesma liña, o candidato do BNG de Vigo cualificou de “insoportábel” que máis de 3.600 crianzas da área sanitaria non teñan hoxe asignado pediatra, que sexan continuas as ausencias non cubertas ou que as xubilacións non se substitúan. Lembrou, ademais, que “o capricho do PP” xa deixou sen pediatra durante o verán a centos de nenos e nenas nas parroquias da cidade.

Castigo sádico que se ceba cos máis vulnerábeis

“Estes novos recortes son un castigo sádico que se ceba cos máis vulnerábeis, cando a saúde das nosas fillas e fillos sempre ten que ir por diante”, defendeu Igrexas, que advertiu á delegada da Xunta en Vigo e candidata do PP, Marta Fernández-Tapias, que non van permitir que sigan poñen en risco a saúde das crianzas da área. “Só buscan seguir estimulando o grande negocio das súas empresas amigas na sanidade privada, como demostra que elección tras elección teñan algún representante das mesmas na súa candidatura en Vigo”.

También te puede interesar