No congreso da Radiological Society of North America (RSNA)
Un estudo da área de Radioloxía Abdominal e Xenitourinaria do servizo de Radiodiagnóstico do Complexo Hospitalario Universitaro de Vigo (Chuvi) recibiu un recoñecemento a nivel mundial no recente Congreso da Sociedade Norteamericana de Radioloxía (RSNA), celebrado en Chicago.
O traballo, premiado cun “Certificado de Mérito”, está asinado polos doutores Sofía Santos, Paolo Franco e Alejandra García, e foi coordinado pola xefa de sección de Abdome e Xenitourinario, a doutora Milagros Otero.
Así, o obxectivo do mesmo era establecer uns criterios diagnósticos para axudar a diferenciar a través da Resonancia Magnética as lesións quístico-hepáticas benignas das malignas. Aínda que o 90% destas lesións son benignas e non necesitan seguimento, existe unha pequena porcentaxe que son potencialmente malignas e que requiren dun control e, ás veces, tratamento cirúrxico. A imaxe por Resonancia Magnética (RM) ten un papel fundamental no diagnóstico deste tipo de lesións, para discriminar a natureza dos mesmos e realizar un seguimento a aqueles con risco de malignidade.
Segundo explica a doutora Otero “estamos moi orgullosos deste recoñecemento xa que trátase do foro científico internacional máis importante no ámbito radiolóxico e supón unha validación ao noso traballo.”
Único Centro formador en España
O Servizo de Radioloxía do Hospital Álvaro Cunqueiro entrou este ano no ranking dos 5 mellores hospitais europeos, seleccionados pola Sociedade Europea de Radioloxía (ESR) para o intercambio de becas de formación académica en toda Europa.
De feito, é o único centro de España elixido para impartir esta formación superespecializada, xunto a 1 hospital de Francia, 2 de Gran Bretaña e 1 de Suiza. Así, este ano virán ao hospital vigués 5 radiólogos e radiólogas doutros hospitais españois, de Italia e Portugal.
Grande capacitación dos nosos profesionais
O Álvaro Cuqueiro foi elixido centro formador atendendo a diferentes criterios, como a importante dotación de equipamento radiolóxico dispoñible; a gran capacitación dos seus profesionais, cunha acreditada experiencia no desenvolvemento das novas técnicas; así como o elevado volume de actividade realizada.
Presenza en congresos internacionais
Ao longo dos últimos anos, o servizo de Radioloxía do Álvaro Cunqueiro ten feito un traballo recoñecido en moitos ámbitos. Está presente nos congresos nacionais e internacionais da especialidade. O feito de dispoñer de todas as técnicas avanzadas de diagnóstico e a posta en marcha da Unidade de Investigación en Radioloxía, o converte nun servizo referente ao que enviar a formarse os radiólogos e radiólogas do futuro.
