RGPD - Cookies
Destacados Vigo al minuto

Les Luthiers, esta fin de semana en Vigo

Co seu espectáculo ‘Gran Reserva’

Les Luthiers, esta fin de semana en Vigo

Co seu espectáculo ‘Gran Reserva’

O Auditorio Mar de Vigo acollerá esta fin de semana unha das actuacións máis agardadas do outono. Desde este venres e ata o domingo, en tres funcións, os históricos humoristas arxentinos Les Luthiers, deleitarán ao público co seu espectáculo ‘Gran Reserva’, unha antoloxía dos seus grandes éxitos. O venres actuarán ás 21.00 horas e o sábado e o domingo en función de tarde, ás 18.00 horas.

55 anos de historia

Coa súa fórmula de música en directo, interpretación e grandes doses de humor, Les Luthiers suman máis de 55 anos de historia xirando polos escenarios de todo o mundo.

O seu éxito está baseado nos instrumentos rocambolescos que tocan, fabricados por eles mesmos, na súa experiencia como intérpretes cómicos e nun humor intelixente, elegante e desprovisto de ofensas, que os converte nuns artistas interxeracionais, para públicos de todas as idades. 

Moitos dos seus gags, xa son case patrimonio universal do humor, como ‘Quien conociera a María, armaría’, ‘Rhapsody en Balls’ ou ‘La Balada del 7º Regimiento’. Este traballo escénico ao longo de décadas serviulles para obter grandes recoñecementos como o Grammy Latino especial á Excelencia Musical ou o Premio Princesa de Asturias de Comunicación e Humanidades, en 2017.

Dous membros históricos

A formación actual de Les Luthiers mantén dous membros históricos, como Carlos López Puccio e Jorge Maronna, aos que se suman Roberto Antier, Tomás Mayer-Wolf, Martin O’Connor e Horacio Tato Turano. O grupo arxentino está inmerso nunha nova xira española, coa que farán parada en Vigo, unha cidade na que adoitan ter un enorme éxito.

‘El Médico’ e ‘Peter’

A actuación de Les Luthiers é o primeiro dos grandes espectáculos que programará este outono o Mar de Vigo. Outros dos principais atractivos serán os grandes musicais ‘El Médico, El Musical’, baseado no best seller do escritor Noah Gordon, que terá catro funcións entre o 11 e o 13 de novembro, e o agardado ‘Peter, El Musical’, unha das sensacións da tepada de musicais, que tamén prevé cinco funcións entre o 2 e o 4 de decembro.

Esta programación pode consultarse na páxina web do Auditorio Mar de Vigo. As entradas para todos os espectáculos están á venda a través de www.teuticket.com.

También te puede interesar