A situación súmase ao «abandono que padecen as instalacións deportivas»
O Bloque Nacionalista Galego de Vigo denuncia as condicións «insalubres» nos vestiarios das pistas de atletismo de Balaídos. Dende o BNG recóllense as protestas das e dos atletas diante da «evidente falla de limpeza» e a inundación dos aseos nas últimas semanas.
Este situación, apunta o concelleiro do Bloque, se suma ao «total abandono» que padecen as instalacións deportivas, desde hai anos, por parte do goberno de Abel Caballero.
Xabier P. Igrexas trasladou a denuncia á concellería de Deportes, dirixida por Manel Fernández, instando a adopción de medidas para que a empresa responsábel da limpeza, Star Servizos, resolva de maneira inmediata estas deficiencias.
«Abel Caballero son se atrevería a poñer un só pé alí»
Igrexas subliñou que «as e os deportistas de Vigo non merecen ser castigados cunhas instalacións obsoletas e sucias nas que Abel Caballero, non se atrevería a poñer un só pé». Nese sentido, reiterou a esixencia do BNG de realizar a remodelación comprometida das pistas de atletismo, pendente desde 2008.
Un convenio asinado por Concello e Xunta hai 14 anos…que non se cumpre
O concelleiro do BNG acusou tanto ao Concello de Vigo como á Xunta de ter nun estado «lamentábel» as instalacións de Balaídos polas continuas leas partidistas entre PSOE e PP. Urxiu a facer efectivo o convenio de reforma asinado por ambas institucións hai 14 anos e, singularmente, chamou ao alcalde a cumprir coa promesa realizada en xullo de
2021 de iniciar o proxecto para remodelación.
