Convocada pola Mesa, este xoves
O Tribunal Superior de Xustiza de Galiza vén de resolver a favor do recurso interposto pola Mesa pola Normalización Lingüística contra a decisión da subdelegación do goberno español en Pontevedra de prohibir a denuncia pública da deturpación do nome lexítimo da Toxa na cuarta edición do «Foro La Toja».
Así, o TSXG obriga o goberno español a permitir a concentración que se celebrará este xoves, 29 de setembro, ás 19h no paseo do Mar da Illa da Toxa, tal e como propuxera a Policía Local do Grove no seu momento.
Talante pouco democrático da Delegación do Goberno
A Mesa pola Normalización Lingüística lamenta o talante pouco democrático amosado polos representantes do goberno español na Galiza, optando por «limitar os dereitos civís e lingüísticos da poboación en lugar de asumir as alternativas que ofrecían as propias forzas e corpos de seguridade para poder garantilos e que non se molestaron en compartir coa entidade organizadora da protesta».
Facer calar a quen defende o exercicio dos dereitos civís
O presidente da entidade de defensa da lingua, Marcos Maceira, afirma que esta resolución pon en evidencia o ánimo da delegación do goberno na Galiza de «facer calar a quen defende o exercicio dos dereitos civís e lingüísticos, mentres ampara quen os incumpre». «Se as autoridades asistentes ao acto tivesen realmente vontade de garantir o cumprimento da lexislación», engade Maceira, «non acudirían a um acto que fai gala do desprezo por ela».
A Mesa insta a Delegación do goberno a garantir os dereitos lingüísticos e civís en toda a administración do Estado e no comportamento dos seus representantes no canto de empregar a prohibición e as sancións contra quen exerce estes dereitos.
«Se a Delegación do Goberno quere impedir manifestacións como a gañada diante do TSXG», remata Marcos Maceira, «só ten que actuar con algo máis de dilixencia á hora de garantir o uso do galego en organismos como Facenda, Seguridade Social, servizo de emprego, forzas de seguranza ou TVE». «Non precisa tanta como a amosada para prohibir o exercicio do dereito ao uso do galego ou á manifestación«, sentencia
