O Concello do Rosal abrirá o vindeiro luns 23 de maio o prazo de inscrición para participar no Campamento de Verán municipal.
Nenas e nenos de Infantil e Primaria
Está dirixido a nenos e nenas matriculados o curso 2021/2022 en 4º, 5º ou 6º de educación infantil ou en educación primaria.
O obxectivo desta iniciativa é «conciliar a vida familiar e laboral a través de actividades educativas e lúdicas coas que dinamizar o tempo libre de rapaces e rapazas tras rematar o período lectivo», como salienta a alcaldesa, Ánxela Fernández Callís.
Xullo e agosto
O campamento, que se desenvolverá na Escola de Marzán durante os meses de xullo e agosto, contará con 20 prazas de luns a venres de 09.00 a 14.00 horas e outras 10 prazas en horario de 08.00 a 15.00 horas.
O prezo por persoa será de 100 ou 125 euros ao mes, dependendo do horario solicitado.
Empadrodos no Rosal
Poderán solicitar praza aqueles nenos e nenas empadroados no Rosal ou que os seus pais, nais ou titores legais traballen ou posúan un negocio no municipio.
As persoas interesadas poderán presentar a súa solicitude ata o vindeiro 3 de xuño por Sede Electrónica ou presencialmente no Rexistro municipal en horario de 09.00 a 14 horas.
Documentación
A documentación necesaria é: solicitude de participación; autorización de recollida do ou da menor, cuestionario de saúde e autonomía persoal; fotocopia do DNI do pai/nai/titor/titora do ou da menor; fotocopia do libro de familia; situación laboral; vida laboral e certificado de discapacidade do ou da participante, de monoparentalidade ou de familia numerosa en caso de precisalo.
