RGPD - Cookies
Destacados Vigo al minuto

Aumentan as esperas nos centros de saúde de Vigo que chegan a dúas semanas en Navia

En todos eles chegan a 1 semana ou 10 días

Aumentan as esperas nos centros de saúde de Vigo que chegan a dúas semanas en Navia

O Bloque Nacionalista Galego alerta dun novo aumento “moi preocupante” dos tempos de espera na Atención Primaria de Vigo.

Ata dúas semanas en Navia

Dende o BNG realízase esta denuncia tras recibir numerosas queixas veciñais por demoras para ter unha cita que, nalgúns centros de saúde como Navia, chegan até as dúas semanas para ser atendidos por un médico ou médica de Familia.

“Esta situación é consecuencia directa das políticas de recorte aplicadas nos últimos anos pola Xunta en contra da sanidade pública no seu conxunto, pero que se ten cebado especialmente en contra da Atención Primaria”, recriminou o concelleiro do BNG en Vigo, Xabier P. Igrexas.

Coia, A Dobrada, Casco Vello e Coruxo

Desde o BNG advirten de que este aumento das esperas afecta a todos os centros de saúde de Vigo, mais teñen especial incidencia nos ambulatorios de Coia, A Dobrada, Casco Vello e Coruxo. “Falamos de ter que esperar como mínimo unha semana, dez días e mesmo máis de dúas semanas no caso de Navia para conseguir unha cita”, criticou Igrexas.

Estas demoras, denuncian desde o Bloque, están a provocar unha sobrecarga asistencial no Punto de Atención Continuada (PAC) e nas urxencias do Hospital Álvaro Cunqueiro. “A saúde non pode esperar, a enfermidade non se presenta cando lle convén administrativamente á Xunta do PP”, afeou Igrexas, que cualificou de “inaceptábeis” estas longas esperas.

Rectificación da Xunta do PP

O concelleiro do BNG reiterou a urxencia dunha rectificación da «política sanitaria de recortes e privatización do Goberno galego do PP» que, asegurou, teñen convertido Vigo na “zona cero da desfeita sanitaria”.

Neste sentido, Xabier P.Igrexas pediu á delegada da Xunta na cidade, Marta Fernández-Tapias, que “deixe de repartir pegatinas do Xaboceo e abandone a xira propagandística permanente” para atender as verdadeiras necesidades da veciñanza viguesa, a principiar por “garantir o seu dereito á atención sanitaria”

También te puede interesar