A Asociación Veciñal de Teis vén de demandar unha saída á rúa Ángela Iglesias e cuestiona o proxecto anunciado dende o Concello dunhas escaleiras mecánicas.
Nunha nota enviada aos medios de comunicación explican que a rúa Ángela Iglesias Rebollar, non conta cunha saída e ten un desnivel do 15% que separa a Avenida de Galicia do centro de saúde de Teis. “Isto supón un grave problema para unha parte da veciñanza sobre todo maior”, apuntan.
Por iso, a asociación veciñal considera necesario darlle unha saída a está rúa, o que permitiría que o autobús urbano (a liña C3) chegara ao centro de saúde e facilitaría a accesibilidade da veciñanza con mobilidade reducida.
Escaleira mecánica
En relación coa proposta da colocación dunha escaleira mecánica no medio da rúa, desde Asociación consideran que é “unha mala proposta”. Comentan que “as escaleiras impedirían que acceda o autobús até o centro de saúde, eliminarían moitas prazas de estacionamento e estragarían a rúa”.
‘Elevadores’
Consideran que o Concello ten que atopar outro emprazamento para as escaleiras mecánicas ou “procurar outra alternativa, como a colocación duns elevadores no lugar”, como propuxeron hai semanas á Concellaría de Fomento.
