A Xunta eliminou un punto de vertido de augas residuais que se producía cara a un rego innominado, próximo ao río Lagares, no lugar da Bagunda, en Vigo.
O punto de vertido foi detectado polo persoal do Plan de Control de Vertidos, dependente de Augas de Galicia, durante tarefas rutineiras de inspección que se levan a cabo nos distintos termos municipais do ámbito territorial da Demarcación Hidrográfica Galicia-Costa.
Augas residuais industriais
Os profesionais de Inspección localizaron un foco irregular de augas residuais industrias cara ao dominio público hidráulico, consistente no bombeo de auga mesturada con lodo que se levaba a cabo desde unha obra de construción. Tras identificarse o titular, a Xunta requiriulle a emenda do vertido.
Nunha nova inspección á zona, o persoal de Augas de Galicia verificou a finalización do foco de augas residuais ao dominio público hidráulico, en cumprimento do requirimento efectuado ao titular.
