O Concello de Redondela deu por rematadas as obras de mellora e adecuación do Camiño dos Quinteiros, na parroquia de San Estevo de Negros, traballos cos que se busca mellorar a accesibilidade viaria.
A actuación de mellora desenvolveuse nun treito de preto dos 500 metros (486,74) –entre o camiño de Negros e o Camiño da Lameira– e cunha largura media de 5,32 metros. Tal e como sinala o informe técnico, o camiño posuía unha capa de rodadura en aglomerado e atopábase cun alto grao de deterioro.
A superficie a pavimentar abrangueu todo o ancho da calzada dende o limite das propiedades, muros ou cunetas e, unha vez asfaltado, púxose á nova cota de tapas de pozos, reixas e arquetas de rexistro. As obras foron incluídas no Plan Marco: Mellora de camiños municipais de acceso a parcela agrícolas 2021-2022, promovido pola Axencia Galega de Desenvolvemento Rural (Agader)
A alcaldesa de Redondela, Digna Rivas, que visitou o estado das obas acompañada do concelleiro de Vías e Obras, Vicente Lamas, subliñou a importancia destes traballos «que melloran as comunicacións, facilitan á vida á veciñanza e contribúen a vertebrar o municipio».
«Non se trata de obras illadas –puntualiza a rexedora redondelá– senón dun plan global que desenvolve a Concellería de Vías e Obras e que ten como finalidade que as nosas parroquias poidan contar cunhas estradas e camiños adecuados ás necesidades das veciñas e veciños».
