A comida para os pacientes do Cunqueiro chega de Zaragoza. Así o denunciou hoxe a CIG, que informa do peche temporal da cociña do Cunqueiro.
Para a central confírmanse «as denuncias feitas a respecto dos recortes na calidade da construción do hospital”. Neste sentido apunta que hai que facer obras na cociña, tras apenas cinco anos de funcionamento e que por isto a comida para os pacientes chegará dende máis de 800 kilómetros de distancia, cando menos durante 2 meses.
O SERGAS non informou
Dende a CIG apuntan que o SERGAS non informase de que a comida para os pacientes do Cunqueiro chega dende Zaragoza. Ademáis rexeita que calase sobre «a decisión da empresa concesionaria [do hospital] de pechar a cociña e trasladar a comida en camións dende a capital aragonesa”.
Á vista destes feitos, a central esixe unha explicación a Sanidade e denuncia a súa irresponsabilidade por deixar a saúde dos pacientes nas mans de “fondos de investimento voitre”.
