Como xa aconteceu anteriormente, as persoas pertencentes á convocatoria de Axudas Posdoutorais da Xunta 2017 que foron nais durante a duración dos seus contratos, «volven atopar as mesmas dificultades para continuar coa súa carreira investigadora».
«Desamparo e discriminación por maternidade«
O motivo, denuncia InvestiGal, é a falta de previsión e da negativa a
implementar cambios significativos por parte da Consellería de Educación, e a Axencia Galega de Innovación (GAIN) para «evitar situacións de desamparo e discriminación por maternidade que xa se están a converter en recorrentes dentro do sistema universitario e investigador galego».
InvestiGal reitera a importancia que ten que as persoas que disfrutaron de permisos de maternidade dispoñan de mecanismos reais de equiparación co resto das persoas coas que deben concorrer á seguinte convocatoria. Para iso deben establecerse, «criterios para ponderar os seus currículums ou outros que se consideren pertinentes para evitar que os períodos de suspensión conten como tempo traballado, e que a maternidade supoña unha penalización nas súas carreiras».
Amparadas pola Valedora do Pobo
Recentemente, incluso a valedora do Pobo se pronunciou a favor en resposta á queixa interposta por afectadas deste colectivo, da que a prensa se fixo eco.
A Xunta non responde
Tanto InvestiGal como as persoas afectadas por permisos de maternidade e pertencentes á convocatoria 2017 solicitaron á Xunta unha reunión. Na mesma querían pedir que lles aclaren as medidas ante a vindeira convocatoria de axudas que supoñen a continuación da súas carreiras investigadoras e que, previsiblemente, sairá a principios do 2021.
«Dada a falta de interese á hora de facer calquera tipo de aclaración», presentouse por rexistro un documento cunha serie de propostas. A Xunta podería aplicar as mesmas de maneira inmediata para «rematar con esta discriminación manifesta».
Cumprir a lei
Estas medidas teñen como finalidade o obxectivo de que se cumpra a lei vixente, tanto autonómica, como nacional e europea en materia de igualdade.
InvestiGal insta á Consellería de Educación e a GAIN a aplicar a
lei e a rematar dunha vez por todas con este tipo de «situacións inxustas que se veñen repetindo ano tras ano».
Ademáis a Rede pola Investigación insta á Conselleira de Emprego a mediar para que estas situacións de «discriminación por xénero e violencia estructural»contra as mulleres no ámbito da investigación deixen de producirse.
