Diante da «persistencia das agresións» do Reino de Marrocos contra a soberanía do Sáhara Occidental, a súa «intervención ilegal en Guerguerat» e, en consecuencia, a ruptura do alto o fogo asinado entre as dúas partes no ano 1991, e dada a pasividade para resolver o conflito por parte da ONU e o silenzo habitual do goberno de España, desde Solidariedade Galega co Pobo Saharaui (SOGAPS) e a Delegación Saharaui para Galicia, «vémonos na obriga de seguir mobilizando e facendo un chamamento á solidariedade co pobo saharaui e o seu lexítimo representante, o Frente Polisario».
Violacións de dereitos humanos
Un pobo que «leva agardando pacíficamente durante anos o cumprimento dos acordos», o paso da Misión das Nacións Unidas para o Referendo do Sáhara Occidental (MINURSO) polo seu territorio, que, no canto de levar a cabo a súa misión, «actuou como cómplice do estado agresor e ocupante». Padecendo «constantes violacións dos dereitos humanos», represión, detencións de presos políticos, torturados nos cárceres marroquís. «Vendo como os seus recursos son esquilmados por Marrocos e as compañías de occidente», a pesar de que tribunais da propia Unión Europea teñen ditado sentenza en contra destas prácticas.
Convocar o Referendo de Autodeterminación
«Cremos que xa vai sendo hora de que se poña a solución definitiva a esta situación», e iso pasa necesariamente por convocar xa o acordado Referéndum de Autodeterminación, que poida rematar coa definitiva independencia da República Arabe Saharaui Democrática (RASD).
A ONU, a Unión Europea e, por suposto, o Estado Español, deben actuar de inmediato, antes de que siga a medrar o conflito armado.
«Por todo isto, facemos un chamamento a todas as institucións, sindicatos, partidos políticos, organizacións sociais e á cidadanía de Galicia», a participar nas concentracións de apoio que se celebrarán o vindeiro xoves, día 26 de novembro, ás 19:30 h. nas 7 grandes cidades de Galicia, nos seguintes lugares:
Vigo: Diante do Marco.
Pontevedra: Subdelegación do Goberno.
A Coruña: Subdelegación do Goberno.
Santiago de Compostela: Praza das Praterías.
Ferrol: Diante do Edificio da Xunta.
Ourense: Subdelegación do Goberno.
Lugo: Subdelegación do Goberno.
